Almatynyń taýly aımaqtarynda 4-5 shilde kúnderi sel qaýpi joǵary
ALMATY. KAZINFORM — Almatynyń tótenshe jaǵdaılar departamenti turǵyndar men qala qonaqtaryna aldaǵy kúnderi taýǵa barmaýǵa keńes berdi. «Qazgıdromet» RMK-nyń daýyldy eskertýine sáıkes, 4-5 shilde aralyǵynda nóser jaýyn-shashynǵa baılanysty taýly aımaqtarda sel júrý qaýpi bar.
Vedomstvonyń habarlaýynsha, 4 shilde kúni qalada kúndiz ótkinshi jańbyr jaýyp, naızaǵaı oınaıdy. Batystan soǵatyn jeldiń ekpini sekýndyna 15-20 metrge deıin jetedi.
Al Іle Alataýynyń taýly bólikterinde, onyń ishinde Medeý jáne Bostandyq aýdandarynda jańbyr, naızaǵaı, keı jerde nóser jańbyr, burshaq jáne ekpindi jel boljanyp otyr. Jeldiń jyldamdyǵy sekýndyna 15-20 metr bolsa, kúndiz keı jerde 23-28 metrge deıin kúsheıýi múmkin.
Sınoptıkterdiń boljamynsha, 4-5 shilde aralyǵynda nóser jaýyn-shashyn saldarynan taýly aımaqtarda sel júrý qaýpi saqtalady.
Osyǵan baılanysty tótenshe jaǵdaılar departamenti turǵyndar men týrısterge daýyldy eskertý kezinde taýǵa shyqpaýǵa, avtokólikterdi aǵashtardyń túbine qoımaýǵa, sondaı-aq álsiz bekitilgen qurylymdardyń mańynda turmaýǵa keńes berdi. Sonymen qatar azamattarǵa tótenshe jaǵdaılar qyzmetiniń resmı habarlamalaryn turaqty túrde baqylap otyrý usynyldy.
Aıta keteıik, 1 shilde kúni Úlken Almaty ózeninde sý deńgeıi kóterildi. Sondaı-aq Aqsaı ózeni arnasynan shyqty. Qala turǵyndary tabıǵı qubylystyń saldaryn áleýmettik jelide bólisip jatyr.
Eske salaıyq, buǵan deıin Úlken Almaty ózeni arnasynda granıt tastarǵa zaqym kelgenin habarlaǵanbyz. Bul jaǵdaıǵa baılanysty Almaty ákimdigi túsinik berdi.
Almatyda jańbyrly aýa raıyna baılanysty tótenshe jaǵdaı qyzmetteri kúsheıtilgen jumys rejımine kóshirildi.
