Almatynyń taýly aımaǵynda turǵyn úı salýǵa moratorıı engiziledi
ALMATY. KAZINFORM – Almatyda qalalyq máslıhatynyń kezekten tys XXHVI sessııasy ótti.
Onda «Almaty qalasynyń aýmaǵynda qurylys salý qaǵıdalaryn bekitý týraly» máslıhat sheshimine ózgerister engizý máselesi talqylandy. Sáýlet jáne qala qurylysy basqarmasynyń basshysy Almas Jańbyrshy qalanyń taýly aýdandarynda turǵyn úı keshenderiniń qurylysyna shekteý qoıatyn moratorıı jobasyn tanystyrdy:
* Bas josparmen qarastyrylǵan áleýmettik ınfraqurylym jáne týrıstik klaster nysandaryn qospaǵanda kóppáterli turǵyn úıler men turǵyn keshenderin salýǵa tyıym salynady;
* Eger nysan qoldanystaǵy áleýmettik, kólik jáne ınjenerlik ınfraqurylymǵa qosymsha salmaq túsiretin bolsa, tyǵyz qurylysqa jol berilmeıdi.
— Atalǵan shekteýler jańǵyrtý jumystaryna, qaıta josparlaý jáne qoldanystaǵy nysandardy kúrdeli jóndeý jumystaryna, belgilengen parametrler sheginde, qoldanylmaıdy. Moratorıı qalanyń tabıǵı ortasyn qalpyna keltirý jáne jaqsartýǵa, taýmbetkeılerin nyǵaıtýǵa, qaýipsizdik pen turaqty damýdy qamtamasyz etýge, sondaı-aq týrıstik klasterdi qalyptastyrýǵa yqpal etedi, - dedi Almas Jańbyrshy.
Sessııa barysynda Almaty ákiminiń orynbasary Beıbit Shahanov «moratorıı engiziletin aımaqta keńse ǵımaratyn salýǵa bola ma» degen suraqqa jaýap berdi.
— Usynylǵan sheshim boıynsha tek áleýmettik jáne týrıstik obektilerdi salýǵa ruqsat etiledi. Ol tizimge keńse ǵımarattary kirmeıdi. Áleýmettik nysandarǵa mektep, balabaqsha, emhana jáne basqa da adam ómirine qajetti ınfraqurylym jatady. Al týrıstik nysandardan birinshi kezekte qonaqúılerdi aıta alamyz, - dedi Beıbit Shahanov.
Al sáýlet jáne qala qurylysy basqarmasynyń basshysy Almas Jańbyrshy jańa erejelerge baılanysty 2023 jyldyń 3 mamyrynda qabyldanǵan Almaty qalasynyń Bas josparyna ózgerister engiziletinin atap ótti. Onyń aıtýynsha, 2026 jyldyń mamyr aıynda ózgerister bektilip, sol jyldyń sońyna deıin egjeı-tegjeıli jospar ózgertiledi.
Eske salaıyq, buǵan deıin Almatydaǵy 40 qabatty úıdiń qurylysyna nelikten tyıym salynbaıtynyn jazǵanbyz.