Almatynyń taýly aımaǵynda endi kópqabatty úı salýǵa bolmaıdy

ALMATY. KAZINFORM – Almaty ákimdigi Memleket basshysy Qasym-Jomart Toqaevtyń tapsyrmasy negizinde qaladaǵy qurylysqa qandaı shekteýler engiziletinin túsindirdi.

Birer kún buryn Prezıdent Almaty ákimi Darhan Satybaldyny qabyldap, qalanyń joǵarǵy bóliginde kóppáterli turǵyn úı salýǵa moratorıı engizýdi tapsyrdy.

Qalalyq josparlaý jáne ýrbanıstıka basqarmasynyń málimetinshe, moratorıı Talǵar tasjolynyń, Shyǵys aınalma avtojolynyń, Ál-Farabı dańǵylynyń, Saın jáne Jandosov kósheleriniń ońtústigine qaraı ornalasqan aýmaqtarǵa qoldanylady.

Vedomstvo jaýabyna sáıkes, bul aýmaqtaǵy qarqyndy qurylys birqatar júıeli máselege tirelip otyr, atap aıtqanda:

* bilim berý jáne medıtsına mekemeleriniń jetispeýshiligi;

* ortalyqtandyrylǵan sýmen jabdyqtaý jáne káriz júıesiniń bolmaýy;

* ınjenerlik jelilerge shamadan tys júk túsýi;

* kóshe-jol jelisine júktemeniń artýy;

* aryq júıesiniń jetispeýshiliginen sýdyń tasýy.

— Qurylysshylar zańnamada naqty rettelmegen, «taýnhaýs» dep atalatyn kópqabatty turǵyn úılerdi salyp jatyr. Moratorııge sáıkes, mundaı úılerge jobalyq-smetalyq qujattama berilmeıdi. Alaıda bul shekteý qazir salynyp jatqan nysandarǵa qoldanylmaıdy, — dedi Qalalyq josparlaý jáne ýrbanıstıka basqarmasynyń basshysy Almas Janbyrshy.

Sondaı-aq ol taýly aımaqta buryn oblystan qala qaramaǵyna berilgen aýyl sharýashylyǵy maqsatyndaǵy ıgerilmegen 1,5 myń ýchaske (2000 gektardan astam jer) bar ekenin atap ótti. Aldaǵy ýaqytta Almaty qalasyn 2040 jylǵa deıin damytý jónindegi Bas josparyna ózgerister engiziletin bolady. Basty maqsat — jasyl aımaqtardyń úlesin arttyrý jáne taýly aımaqtardy úılesimdi damytý.

Eske salaıyq, buǵan deıin jańa zań kópqabatty úılerdi basqarý isine qandaı ózgeris ákeletinin jazǵanbyz.