Almatynyń taýly aımaǵynda aýyz sý máselesi qalaı sheshilip jatyr

ALMATY. KAZINFORM — Medeý aýdanynyń ákimi Erkebulan Orazalın aýdanda aýyz sý máselesi qalaı sheshilip jatqanyn aıtty.

Medeý aýdanynyń taýly aımaǵynda kóp jyl boıy aýyz sý máselesi ózekti bolyp keldi. Ony sheshý úshin byltyr qazan aıynan bastap «Balqash» rezervýarynan «Muztaý» shaǵyn aýdanyna deıin 2,2 shaqyrym magıstraldyq jeli tartyla bastaǵan. Oǵan 574 mıllıon teńge bólindi. Joba iske qosylǵanda 2 myń adam taza aýyz sýmen qamtamasyz etiledi. Jumys 2025 jyldyń qyrkúıeginde aıaqtalady.

Sonymen qatar Erkebulan Orazalın «Kamensk ústirti» shaǵyn aýdanyna erekshe nazar aýdarylyp otyrǵanyn atap ótti.

— Ótken jyly munda 6 artezıan uńǵymasy, 12 sorǵy, 7 rezervýar salynyp, 6,1 shaqyrymdyq magıstraldyq jeli tartyldy. Bıyl jalpy uzyndyǵy 50 shaqyrym bolatyn sý taratý jelisiniń qurylysy bastaldy. Bul shaǵyn aýdan turǵyndaryn taza aýyz sýmen turaqty qamtamasyz etýge múmkindik bermek. Qurylys 2026 jyldyń qyrkúıeginde aıaqtalady, — dedi ol.

Odan bólek «Atyraý», «Alataý», «Gornyı gıgant» pen «Malaıa Stanıtsa» shaǵyn aýdandarynda 21 shaqyrym sý qubyry men 45,2 shaqyrym káriz jelisi salynyp jatyr. Sonyń arqasynda Medeý aýdanyndaǵy 21 myńnan astam turǵynnyń alǵash ret ortalyqtanǵan sýǵa qoly jetip, sý burý júıesine qosylǵaly otyr.

Eske salaıyq, 2024 jyly Medeý aýdanynda «Balqash» taza sý rezervýary paıdalanýǵa berildi.