Almatynyń taýynda qıyndyqqa tap bolǵan azamat SOS sıgnaly arqyly aman qaldy
ASTANA. KAZINFORM — Almatynyń Medeý aýdanynda taýda jalǵyz serýendep júrgen jigit qutqaryldy, dep habarlaıdy Tótenshe jaǵdaılar mınıstrliginiń baspasóz qyzmeti.
«Myńjylqy» ústirtinen túsip kele jatqan týrıster qarańǵyda SOS belgisin berip turǵan jaryqty baıqaıdy. Qashyqtyq alys bolǵandyqtan, aıqaılaǵan daýys estilmegen. Qutqarý qyzmeti men TJM «Barys» jasaǵy dereý kómekke attandy.
Qutqarýshylar oqıǵa ornyna jetip, jartasta turyp qalǵan adammen baılanys ornatty. Belgili bolǵandaı, 1996 jyly týǵan azamat eshqandaı daıyndyqsyz jáne jabdyqsyz tik jartasqa shyqpaq bolǵan.
Jigit jotamen jalǵyz kele jatyp, taıyp ketken. Qulaý kezinde ishinde jyly kıimderi bar rıýkzagi tómen qulaǵan. Ol tek sporttyq kostıýmmen jáne qolyndaǵy kishkentaı fonarmen tar beldeýde qalyp qoıǵan. Óz betinshe túse almaǵan soń, SOS sıgnalyn bere bastaǵan.
Bes saǵatqa sozylǵan kúrdeli órmeleýden keıin qutqarýshylar zardap shekken azamatqa jetti. Ony qutqarý úshin mamandar kásibı saqtandyrý quraldaryn qoldanyp, jartastyń joǵary jaǵynan túsý arqyly kúrdeli manevr jasady. Qutqarýshylar jigitti aman-esen tómenge túsirdi. Oǵan medıtsınalyq kómek qajet bolmady.
Buǵan deıin Qapshaǵaı sý qoımasynda muz jarylyp, avtokólik sýǵa batyp ketken. Іshindegi eki áıel qutqaryldy.