Almatynyń taý bókterindegi sý tapshylyǵy máselesi shilde aıynda sheshiledi
ALMATY. KAZINFORM — Almatyda qalany úzdiksiz sýmen qamtamasyz etý boıynsha sharalar belsendi qabyldanyp jatyr.
Almaty qalalyq energetıka jáne sýmen jabdyqtaý basqarmasynyń málimetinshe, bıyl 17 mamyrda «Balqash» taza sý rezervýary paıdalanýǵa berildi.
Joba aıasynda 6,9 myń tekshe metrge 5 rezervýar jáne táýligine 7,3 myń tekshe metrge 3 uńǵyma salyndy. Osy jyldyń 1 maýsymynan bastap ıÝbıleınyı, Kamensk ústirti, Kólsaı, Muztaý shaǵyn aýdan turǵyndaryn sýmen qamtamasyz etý úshin rezervýarǵa 6,1 shaqyrym jańa magıstraldyq jeli júrgizildi.
Byltyr jeltoqsan aıynda qýaty táýligine 15 myń tekshe metr bolatyn «Qarǵaly» sý jınaǵyshynyń qurylysy aıaqtaldy. 1 maýsymda qoldanystaǵy jeliler arqyly sý berile bastady. Sondaı-aq, 6,5 km káriz kollektorynyń qurylysy júrgizilip jatyr. Nysan bıyl qyrkúıek aıynda aıaqtalady.
«Aqsaı» sý jınaǵyshynyń qurylysy belsendi júrgizilip jatyr. Onyń qýaty táýligine 22 myń tekshe metr. Qazirgi tańda nysannyń daıyndyǵy 50%. Qurylys-montajdaý jumystaryn aıaqtaý 2025 jyldyń qarasha aıyna josparlanǵan»,- dep atap ótti basqarmadan.
«Qarǵaly», «Aqsaı» jáne «Balqash» taza sý rezervýary sý jınaǵyshtary qalanyń Naýryzbaı jáne Medeý aýdanynyń 170 myń turǵynyn, sondaı-aq Almaty oblysynyń Jańaturmys jáne Qyrǵaýyldy aýyldarynyń 40 myń turǵynyn turaqty sýmen qamtamasyz etedi.
«Almatynyń joǵarǵy bóliginiń turǵyndaryn sýmen turaqty qamtamasyz etý úshin osy jyldyń aqpan aıynda táýligine 32 myń tekshe metr sýmen jabdyqtaýdyń rezervtik shemasyn salý jónindegi jobany iske asyrý bastaldy. Qazirgi tańda 6 uńǵymany burǵylaý jumystary júrgizilip jatyr, olar úshin 6 birlik tereńdik sorǵylary satyp alyndy. Alańdarda negizgi sorǵy jabdyqtary ornatylady. Rezervtik shemanyń qurylysyn 2024 jyldyń 1 shildesine deıin aıaqtaý josparlanǵan. Bul Almatynyń joǵarǵy bóliginiń 50 myń turǵynyn úzdiksiz sýmen qamtamasyz etýge múmkindik beredi»,- dep habarlady Almaty qalalyq energetıka jáne sýmen jabdyqtaý basqarmasy.
