Almatynyń taý bókterindegi órt: ákimdik qazirgi jaǵdaıdy baıandady

ASTANA. KAZINFORM — Keńsaı shaǵyn aýdanynda tutanǵan órt 22:39 shamasynda aýyzdyqtaldy. Almaty qalasynyń ákimi Darhan Satybaldy órt jaǵdaıyn baqylaýda ustap otyr, dep habarlaıdy qala ákimdigi.

Oqıǵanyń barysy týraly Almaty qalasynyń ákimi Darhan Satybaldyǵa der kezinde habarlanyp otyrdy. Qala basshysynyń tapsyrmasymen oqıǵa ornyna qala ákiminiń orynbasary Beıbit Shahanov bardy.

— Órt sóndirýshiler oqıǵa ornyna jedel jetip, eń áýeli tilsiz jaýdyń turǵyn úılerge taralýyna jol bermeýge kúsh saldy. Saǵat 22:39-da órt oqshaýlandy, halyqqa tóngen qaýip joq. Qazir órttiń sońǵy oshaqtaryn sóndirý jalǵasyp jatyr. Barlyq qajetti kúsh-qural jumyldyryldy, oǵan kommýnaldyq qyzmet pen arnaıy tehnıka da tartylǵan, — dedi Almaty qalasy ákiminiń orynbasary Beıbit Shahanov. 

Almaty qalasy Tótenshe jaǵdaılar departamentiniń málimetinshe, 2025 jyly 25 shilde kúni saǵat 19:53-te Medeý aýdanyna qarasty Keńsaı shaǵynaýdanynda, Sársenbaev kóshesiniń boıynda qurǵaq shóp tutanyp, órt shyqqany týraly habarlama jedel basqarý ortalyǵyna kelip túsken. Aldyn ala esep boıynsha qyzyl jalyn shamamen 15 gektar jerdi sharpyǵan. Órtti sóndirýge Almaty qalasy TJD-nyń 58 qyzmetkeri men 13 tehnıkasy jumyldyryldy. Buǵan qosymsha jergilikti bılik tarapynan taǵy 6 sý tasıtyn kólik pen 6 qyzmetker kómekke tartylǵan. Sársenbaev kóshesi boıyndaǵy jeke turǵyn úılerge órttiń taralý qaýpi joıyldy. Qaza tapqandar men zardap shekkender joq.