Almatynyń taý bókterinde zańsyz salynǵan nysan sot sheshimimen buzyldy
ALMATY. KAZINFORM – Saǵadat Nurmaǵambetov kóshesi, 374/1 mekenjaıynda zańsyz salynǵan tórt qabatty ǵımaratty buzý jumystary bastaldy.
Almaty ákimdiginiń málimetinshe, nysandy menshik ıesi (jeke tulǵa) ruqsat berý qujatynsyz turǵyzǵan.
– Nysan zańsyz salynǵan. 2022 jyly qurylystyń tıisti qujaty bolmaǵandyqtan basqarma óz betinshe salynǵan ǵımaratty buzýǵa talap-aryz bergen edi. Keıin sot protsesi júrdi. Sol jyldyń qarashasynda Almaty qalalyq soty talap-aryzdy qanaǵattandyrdy jáne Almatynyń Ádilet departamenti atqarýshylyq is qozǵaǵan bolatyn,– dep atap ótti basqarmadan.
Qala turǵyndaryna ǵımarattyń zańsyz salynǵanyn eskertý úshin nysan jyljymaıtyn múlikti satyp alýǵa usynylmaıtyn tizimge engizildi.
Almatynyń qala qurylysyn baqylaý basqarmasy jyljymaıtyn múlikti satyp almas buryn onyń qujattarynyń bar-joǵyn bilý úshin +7 705 89 66 000 WhatsApp anyqtamalyq telefon nómirine júginýge keńes beredi.
Eske salaıyq, byltyr Almatynyń taý bókterinde zańsyz salynǵan 52 nysan anyqtalǵan bolatyn.
Budan bólek, Almatyda kóp jyl boıy qurylysy bitpegen nysandar qashan buzylatyny týraly jazǵanbyz.