Almatynyń taý bókterinde eki zańsyz nysan súrildi
ALMATY. KAZINFORM — Sot sheshimimen «Taýly Qyrat» yqsham aýdanynda qurylysy aıaqtalmaǵan eki úı buzyldy.
Qala qurylysyn baqylaý basqarmasynyń málimetinshe, jeke tulǵa ruqsatsyz taý bókterinde úı salǵan. Sonymen qatar qurylys jumystary kezinde atalǵan aýmaqtarǵa jol salý úshin taý bókteriniń etegi kesilip, ekojúıege zalal keltirilgen.
Basqarma jer ýchaskelerin bastapqy qalpyna keltirý týraly nusqama berip, menshik ıesine qatysty ákimshilik sharalar qabyldaǵan. Alaıda nusqamada kórsetilgen talaptar oryndalmaǵandyqtan, basqarma sotqa májbúrlep buzý týraly talap-aryz bergen.
— 2024 jyly 17 qazanda Medeý aýdandyq soty talap-aryzdy qanaǵattandyryp, sot qaýlysy Almaty qalasynyń ádilet departamentine oryndaýǵa jiberilgen. Sot sheshimin oryndaý maqsatynda jýyrda menshik ıesi zańsyz nysandardy ózi buzyp tastady, — dep habarlady basqarmadan.
Eske salaıyq, buǵan deıin Almatynyń taý bókterinde zańsyz salynǵan taýnhaýs buzylyp jatqanyn jazǵanbyz.