Almatynyń taksı qyzmetin elektromobılderge kóshirýge áli erte – Oljas Bektenov
ASTANA. KAZINFORM — Premer-mınıstr Oljas Bektenov Májilis depýtattarynyń saýalyna joldaǵan jaýapta Almaty qalasyndaǵy taksı qyzmetine nege tolyqtaı elektr kólikterge aýystyrý múmkin emestigin túsindirdi.
— Almaty qalasynda 2024 jyly 664 806 kólik tirkeldi. Onyń 567 758-i aralas otynmen (benzın-gaz), 60 466-sy dızelmen, 7 875-i elektr qýatymen jumys isteıdi. Sonymen qatar, búginde qalada elektr energııasy tapshylyǵy ári elektrmen júretin kólikterdi qýattaıtyn ınfraqurylym da joq. Osylaısha, barlyq taksılerdi elektrli kólikterge kezeń-kezeńimen kóshirýdiń úsh jyldyq baǵdarlamasyn ázirleýge áli erte, — delingen jaýapta.
Onyń aıtýynsha, álemde elektromobıl taksı qyzmetine damytyp jatqan elderdiń tájirıbesin Qazaqstanǵa engizý úshin bıýdjetten qarjylyq jeńildikterge qosymsha shyǵyn qarastyrý kerek bolady.
— Qaladaǵy taksıdiń bárin elektr kólikterge kóshirý ınfraqurylym men ekonomıkalyq faktorlarǵa baılanysty bolǵandyqtan kúrdeli jáne kóp satyly protsess. Álemdik tájirıbede Qytaı taksı parkterin elektrli kólikterge kóshirýde kósh bastap keledi. Shenchjen —taksılerdiń 95%-dan astamy elektr kóligine kóshken álemdegi alǵashqy qalalardyń biri. Nıderlandta 2025 jyldan bastap Amsterdamdaǵy barlyq taksıler elektr otynyna kóshýi kerek. Frantsııadaǵy G7 operatory 2030 jylǵa qaraı tolyǵymen elektr kólikterine aýysýdy josparlap otyr, — dep jazady Premer-mınıstr.
Buǵan deıin Kólik mınıstri Marat Qarabaev Almaty men Alataý qalasynyń arasynda sýtegimen júretin tikushaq-taksı paıda bolýy múmkin ekenin málim etken bolatyn.