Almatynyń taǵy birneshe kóshesinde birjaqty qozǵalys engizildi
ALMATY. KAZINFORM — Búgin, 18 maýsymnan bastap Medeý aýdanyndaǵy kóshelerde birjaqty qozǵalys engizildi. Bul týraly Almaty ákimdigi habarlady.
Atap aıtqanda:
— Dostyq dańǵylynyń Gogol kóshesinen Jibek joly dańǵylyna deıingi bóliginde soltústik baǵytta;
— Zenkov kóshesiniń Maqataev kóshesinen Gogol kóshesine deıingi bóliginde ońtústik baǵytta birjaqty qozǵalys engizildi.
Odan bólek Áýezov aýdanynda Atameken kóshesiniń («Atameken» shaǵyn aýdany) № 103 úıden № 108 úıge deıingi bóliginde ońtústik baǵytta birjaqty qozǵalys uıymdastyryldy.
— Atalǵan sheshim Almaty qalasy polıtsııa departamentiniń Ákimshilik polıtsııa basqarmasymen birlesip júzege asyrylyp jatyr jáne kólik júktemesin azaıtýǵa, kóshe jol jelisiniń ótkizý qabiletin arttyrýǵa, sondaı-aq joldaǵy daýly jaǵdaılardyń sanyn qysqartýǵa baǵyttalǵan. Ózgeris qazirgi kólik jaǵdaıyna júrgizilgen taldaý nátıjesi men aýdan turǵyndarynyń ótinishin eskere otyryp qabyldandy, — dedi Almaty qalasynyń jol qozǵalysy jáne jolaýshylar kóligin uıymdastyrý basqarmasynyń ókilderi.
Sondaı-aq birjaqty qozǵalys pılottyq rejımde engiziletini atap ótildi. Aldaǵy sheshimder onyń tıimdiligine júrgiziletin monıtorıng qorytyndysy boıynsha qabyldanady.
Eske salaıyq, buǵan deıin Almatyda Ýálıhanov kóshesiniń Qabanbaı batyr kóshesinen Qazybek bı kóshesine deıingi bóliginde soltústik baǵytta birjaqty qozǵalys engizildi. Sondaı-aq Jýkov kóshesinde (ońtústik baǵytta) jáne Manaev kóshesinde (soltústik baǵytta) Zataevıch kóshesinen Ahmedıarov kóshesine deıingi aralyqta birjaqty qozǵalys uıymdastyryldy.
