14:50, 17 Shilde 2024 | GMT +6
Almatynyń taǵy bir kóshesinde kólik qozǵalysy shekteledi
ALMATY. KAZINFORM – Almatyda Qojabekov kóshesi bir aıǵa jabylady.
Alataý aýdany ákimdiginiń aqparaty boıynsha, sýmen jabdyqtaý jáne sý burýdyń ınjenerlik taratý jelilerin salý jónindegi jumystardy júrgizýge baılanysty Qojabekov kóshesi boıymen qala shekarasynan F. Ońǵarsynova kóshesine deıingi 900 metr qashyqtyqtaǵy jol ýchaskesi 17 shildeden 17 tamyzǵa deıin jabylady.
«Jol qozǵalysy qaýipsizdigi maqsatynda ýaqytsha qolaısyzdyqtarǵa túsinistikpen qarap, kórsetilgen ýchaskeni aınalyp ótý jolyn aldyn ala oılastyrýdy suraımyz», – delingen habarlamada.
Osyǵan deıin Almatyda jylý jelilerin jóndeý jumystaryna baılanysty Manas kóshesindegi ýchaskelerdiń birinde kólik qozǵalysy eki táýlikke shekteletini týraly jazǵan.
