Almatynyń sport basqarmasy WBO eks-chempıonynyń shaǵymyna jaýap berdi
ALMATY. KAZINFORM – Qazaqstandyq bokser Álı Baloev óziniń áleýmettik jelidegi paraqshasynda Almaty qalasynyń sport basqarmasyna shaǵymdanǵan bolatyn. Basqarmanyń baspasóz qyzmeti atalǵan jaǵdaıǵa jaýap berdi.
Sportshy óz paraqshasynda qalalyq sport basqarmasynyń Almatyda týrnır ótkizýge ruqsat bermeýi kesirinen chempıondyq belbeýinen aıyrylyp qalǵanyn jazdy.
— Men Álı Baloev — qazaqstandyq kásibı boksshymyn. 2023 jyly Qytaıda WBO Global chempıondyq tıtýlyn jeńip aldym jáne WBO reıtınginde 12 orynda boldym. Biraq búgingi kúni belbeýdi ýaqytyly qorǵamaýymnyń kesirinen odan aıyrylyp qaldym. WBO Global chempıondyq tıtýlyn qorǵaý úshin Hardcore boxing uıymynyń demeýshiligimen Almaty qalasynda boks keshi uıymdastyrylyp jatqan. Biraq Almaty qalasy sport basqarmasynyń kelisim bermeýinen týrnır ótpeı qaldy. Aqpan aıynan bastap búgingi kúnge deıin olardan Almaty Arena-da bolǵan oqıǵaǵa silteme jasaı otyryp «joq» degen jaýap alyp kelemiz, — dep jazdy boksshy.
Sportshy shaǵymyna jaýap bergen sport basqarmasy Hardcore Boxing uıymdastyrmaqshy bolǵan týrnır sporttyq is-sharalar ótkizý erejelerine sáıkes kelmegenin habarlady. Sondaı-aq promoýshn tıisti túzetýler engizgennen keıin 14 maýsym kúni kásipqoı boks keshin ótkizýge ruqsat alǵanyn málimdedi.
— Almaty qalasynyń sport basqarmasy qazaqstandyq boksshy Álı Baloevtyń ótinishin qarap, Hardcore Boxing promoýshnynyń uıymdastyrýshylaryna shoý-baǵdarlamalar negizinde týrnır ótkizýge ruqsat bermegenin habarlaıdy.
Atalǵan sharanyń formaty medıalyq sıpatta bolǵandyqtan, bul sporttyq is-sharalar ótkizý erejelerine sáıkes kelmeıdi.
15 mamyrda Almaty qalasynyń sport basqarmasynyń ókilderi men uıymdastyrýshylar arasynda kezdesý ótti. Túzetýler men sporttyq jarystardy ótkizý reglamentine sáıkes kelgennen keıin ǵana 14 maýsymda «Almaty Arenada» bas tıtýlǵa talasatyn kásipqoı boks keshin ótkizýge ruqsat berildi, — dep habarlady basqarma baspasóz qyzmetinen.
Keıinirek bul aqparatty kásipqoı boksshy óziniń áleýmettik jelidegi paraqshasynda rastady.
