Almatynyń Saın kóshesi: jańadan ashylǵan joldyń jaı-kúıi qalaı

Saın kóshesin Rysqulov dańǵylynan Móńke bı kóshesine deıin uzartý jobasy aıaqtalýǵa jaqyn. Uzyndyǵy 3,2 shaqyrym bolatyn jańa ýchaskede kólik qozǵalysy ashylǵan. Biraq jol boıynda áli de qurylys jumystary júrip jatyr.

Kazinform agenttiginiń fototilshisi almatylyqtar kópten kútken jańa joldyń osy bóligine baryp, jaǵdaıdy óz kózimen kórip qaıtty. Qazir Alataý aýdanynyń turǵyndary úshin qala ortalyǵyna qaraı jetýi jeńildegen. Jańa jolmen eki baǵytta da kólik kóptep júrip jatyr. Qala úshin mańyzdy kósheniń ózge bóliginde jyldamdyq shekteýi 80 km/saǵ bolsa, jańa ýchaskede 40 km/saǵ jol belgileri qoıylǵan.

Negizgi jol tolyq asfalttalǵan. Degenmen kóshege shyǵatyn ne burylatyn joldar áli de salynyp jatyr. Jaıaý júrginshiler joly men aıaldama da tolyq daıyn emes.

Almaty qalasy jol ınfraqurylymyn damytý basqarmasy agenttik saýalyna jaýap berip, qazirgi ýaqytta Saın kóshesiniń osy bóliginde trotýarlar men jerústi jaıaý júrginshiler ótkelderin salý, sondaı-aq irgeles aýmaqty abattandyrý jumystary júrgizilip jatqanyn atap ótti. Jobany jyldyń sońyna deıin aıaqtaý josparlanǵan.

- Uzyndyǵy 3,2 km bolatyn asfaltbeton jabynyń tómengi qabaty tóseldi. Injenerlik jeliler, onyń ishinde áýe elektr berý jelileri jobalyq sheshimderge sáıkes kóshirildi.Merdiger uıym – «ABM – Building 2007» JShS, - dep habarlady basqarmadan.

Vedomstvo málimetinshe, qurylys-montajdaý jumystarynyń quny – 19,7 mlrd teńge.

Buǵan deıin avtobýstar Saın kóshesiniń uzartylǵan bóligimen júre bastady. 10 maýsymnan bastap № 25, № 99 jáne № 102 baǵyttarynyń qozǵalys syzbalaryna ózgeris engizilip, osy jol ýchaskesi qosyldy.

Eske salaıyq, Saın kóshesin uzartý jobasy 2018 jyly bastalǵan edi. Jumystar jer telimderin satyp alý jumystarynyń aıaqtalýyna qaraı kezeń-kezeńimen júrgizildi. Sońǵy jer telimi 2025 jyly qazan aıynda bosatyldy.

20 maýsymnan bastap Saın kóshesiniń Rysqulov dańǵylynan Mustafın kóshesine deıingi bóliginde pılottyq rejımde qoǵamdyq kóliktiń arnaıy jolaǵy jumys isteı bastaıdy.