Almatynyń Rysqulov dańǵylyndaǵy kópirdi jóndeýge 1,2 mlrd teńge jumsalady
ALMATY. KAZINFORM — Almatynyń Rysqulov dańǵylynda ornalasqan kópir jóndeýden ótedi.
Memlekettik satyp alý saıtynda Almaty qalasynyń Rysqulov dańǵyly men Bókeıhanov kóshesi boıyndaǵy kópir qurylysyn kúrdeli jóndeýge baılanysty baıqaý ótti. Joba quny — 1 211 346 440 teńge. Tapsyrys berýshi — qalalyq jol ınfraqurylymyn damytý basqarmasy. Jumystardy oryndaý merzimi 13 aı bolyp belgilengen.
— Estakadany kúrdeli jóndeý qurylystyń apattyq jaǵdaıyna baılanysty týyndaǵan, negizdemesi — «TestConstruction» kompanııasy oryndaǵan kólik aıryǵyn zertteý esebi. Kúrdeli jóndeý jumystary qurylystyń ólshemderin onyń qazirgi eninen asyrmaı ózgertýdi, sondaı-aq jolótpel tirek baǵandaryn kúsheıtýdi qamtıdy, — delingen lotta usynylǵan qujatta.
Habarlandyrý 2026 jyldyń 29 mamyrynda jarııalanyp, 6 maýsym kúni aıaqtaldy. Baıqaý nátıjesi boıynsha «SErVIS NS» JShS jeńimpaz bolyp anyqtalǵan. Bul kompanııa 2016 jyly tirkelgen jáne Aqmola oblysy, Arshaly kentinde ornalasqan.
Eske salaıyq, buǵan deıin memlekettik satyp alý saıtynda «Qalqaman» metro beketinen «Barlyq» bazaryna deıin Almaty metropolıteniniń úshinshi kezegin salý jobasy boıynsha jobalaý-smetalyq qujattamany ázirleýge habarlandyrý jarııalandy. Jańa metro beketteri Alataý dańǵylynyń boıynda ornalasady.
Sondaı-aq ótken aıda Óskemende sapasyna halyq jıi shaǵymdanatyn Ertis kópirinde jóndeý jumystary bastalady.
