Almatynyń Raıymbek dańǵylyndaǵy BRT jobasy qaıta qaralyp jatyr
ALMATY. KAZINFORM — Almatydaǵy Raıymbek batyr dańǵylynda salynyp jatqan BRT (jedel avtobýs jelisi) jobasy qaıta qaralyp jatyr. Osyǵan baılanysty qurylys jumystary ýaqytsha toqtatylyp, buryn salynǵan ınfraqurylymnyń bir bóligin buzý máselesi kóterildi. Bul jumystar merdiger kompanııanyń qarajaty esebinen atqarylýy múmkin.
Joba 2025 jylǵy sáýir aıynda bastalǵan.
Jalpy uzyndyǵy 17 shaqyrym bolatyn BRT jelisin salý úsh kezeńge bólingen:
• Seıfýllın dańǵylynan Pýshkın kóshesine deıingi 1,8 shaqyrym;
• Ahrımenko kóshesinen Seıfýllın dańǵylyna deıingi 7,2 shaqyrym;
• Ahrımenko kóshesinen Altyn Orda kóshesine deıingi 7,5 shaqyrym.
Jospar boıynsha BRT qurylysy 2026 jyldyń kúzinde aıaqtalýǵa tıis edi. Jobanyń jalpy quny — 39,9 mlrd teńge. Bas merdigerler — «Kazahdorstroı» JShS men «Progress KZ» JShS.
Alaıda qazir Raıymbek dańǵylynda belsendi qurylys jumystary júrgizilip jatqan joq. Buǵan deıin Emtsov kóshesi men Ótegen batyr kóshesiniń aralyǵyndaǵy qoǵamdyq kólikke arnalǵan arnaıy jolaqtyń daıyn bóligin buzý josparlanyp otyrǵany belgili bolǵan.
Qalalyq jol ınfraqurylymyn damytý basqarmasynyń basshysy Oljas Shabdanov redaktsııanyń saýalyna bergen jaýabynda qazirgi ýaqytta jobanyń birinshi jáne ekinshi kezeńderi boıynsha qurylys-montaj jumystarynyń shamamen 37 paıyzy oryndalǵanyn málimdedi.
— Bıyl Raıymbek dańǵylynyń Ótegen batyr kóshesi men Emtsov kóshesi aralyǵyndaǵy jol tóseminiń keıbir elementterin buzý máselesi qarastyrylyp jatyr. Demontaj jumystary bas merdiger uıymnyń qarajaty esebinen júrgiziledi, — dedi ol.
Sonymen qatar jer telimderin memleket muqtajy úshin alý rásimderi aıaqtalǵan ýchaskelerde dańǵyldyń jaıaý júrginshiler aımaǵyn abattandyrý jumystary jalǵasyp jatyr.
Qala bıligi jobanyń bastapqy tujyrymdamasyn ózgertý múmkindigin de qarastyryp otyr. Buryn josparlanǵandaı BRT jelisin joldyń ortasyna ornalastyrýdyń ornyna, qoǵamdyq kólikke arnalǵan arnaıy jolaqtardy Raıymbek dańǵylynyń boıynda joldyń shetki bólikterine kóshirý nusqasy pysyqtalyp jatyr.
Eske salaıyq, buǵan deıin ákimdik Tımırıazev kóshesindegi BRT jelisin bólshekteý jospary týraly habarlaǵan edi.
Munda birjaqty qozǵalys engizilip, qoǵamdyq kólikke arnalǵan arnaıy jolaqtar joldyń shetine aýystyrylmaq. Bolashaqta bul tájirıbeni ál-Farabı dańǵylyna, Shyǵys aınalma avtomobıl jolyna (ShAAJ) jáne Soltústik aınalma kóshesine de engizý josparlanyp otyr.
