Almatynyń Raıymbek dańǵylynda qozǵalys ýaqytsha shekteledi
ALMATY. KAZINFORM — Almatyda jylý jelilerin jóndeý jumystaryna baılanysty Raıymbek dańǵylynyń bir bóligi ýaqytsha jabylady.
— 13 maýsym saǵat 23:00–den bastap 14 maýsym saǵat 08:00–ge deıin Raıymbek dańǵyly boıymen N. Tilendıev kóshesinen Brýsılovskıı kóshesine deıin shyǵys baǵytynda avtokólikter qozǵalysy jartylaı shekteledi. Batys baǵytynda jol ashyq bolady, — dep habarlady ákimdikten.
Ýaqytsha shekteýler aldaǵy jylytý maýsymyna daıyndyq aıasynda, 1994 jyly paıdalanýǵa engizilgen magıstraldi qubyr jelisiniń jóndeý jumystaryn qaýipsiz júrgizý maqsatynda engizilmek.
Osyǵan deıin Almatyda Farıza Ońǵarsynova kóshesiniń bóligi 1 aıǵa jýyq ýaqytqa jabylǵany týraly jazǵanbyz.
Sonymen qatar 1 maýsymnan bastap 20 tamyzǵa deıin Sátpaev kóshesimen Masanchı kóshesinen bastap Baıtursynov kóshesine deıin eki baǵytta qozǵalys shekteldi. 2 maýsymnan bastap 20 tamyzǵa deıin Ǵabdýllın kóshesinde Rımskıı-Korsakov kóshesinen bastap Nahımov kóshesine deıin eki baǵytta da jol jabyldy.
Budan bólek, 10 maýsymnan bastap 1 qyrkúıekke deıin kólik qozǵalysy Qojanov kóshesiniń boıymen Gagarın kóshesinen bastap Jarokov kóshesine deıin, sondaı-aq Jarokov kóshesiniń boıymen Qojanov kóshesinen bastap Dýnaevskaıa kóshesine deıin ońtústik baǵytta kólik qozǵalysy shekteldi. Soltústik baǵytta kólik qozǵalysy eki baǵytta uıymdastyrylady.
Qaıta jańǵyrtý jumystary kezinde turǵyndarǵa ystyq sý úzdiksiz beriledi. Osy jyly qala boıynsha 39 km jylý trassasyn jańǵyrtý kózdelgen. Bul tozý deńgeıin 54 paıyzǵa tómendetedi.