Almatynyń Raıymbek dańǵylynda BRT jelisi qashan iske qosylady
ALMATY. KAZINFORM – Almaty ákimdigi Raıymbek dańǵylyndaǵy BRT jobasy qandaı satyda ekenin túsindirdi.
BRT jelisiniń qurylysy 2025 jyly sáýir aıynda bastaldy. Joba jalpy uzyndyǵy 17 shaqyrym bolatyn úsh ýchaskege bólingen. Olar: Pýshkın kóshesi – Seıfýllın dańǵyly (1,8 km), Seıfýllın dańǵyly – Ahrımenko kóshesi (7,2 km) jáne Ahrımenko kóshesi – Altyn Orda (7,5 km).
Almaty qalasy jol ınfraqurylymyn damytý basqarmasynyń málimetinshe, joba qalalyq ınfraqurylymnyń barlyǵyn: jol bóligin, trotýarlardy, jasyl aımaqtar men qoǵamdyq keńistikterdi qamtıdy. Negizgi maqsat – qoǵamdyq kóliktiń qoljetimdiligin arttyrý jáne jaıly qalalyq orta qalyptastyrý.
– Qurylys-montaj jumystary barlyq úsh ýchaskede birdeı bastaldy. Búgingi tańda jobanyń jalpy daıyndyǵy shamamen 35%-ǵa jetti. Jumystar qajetti jer ýchaskelerin satyp alýǵa baılanysty oryndalyp jatyr. Jobany aıaqtaý 2026 jyldyń sońyna josparlanǵan, - dep habarlady basqarmadan.
Joba merdigerleri retinde «Kazahdorstroı» JShS jáne «Progress KZ» JShS bekitilgen. Shart boıynsha jumystardyń jalpy quny – 39,9 mlrd teńge.
Eske salaıyq, 2025 jyldyń sáýir aıynda Jeltoqsan kóshesinde de BRT jelisiniń qurylysy bastalǵan bolatyn.
Joba qurylysy ýaqtyly aıaqtalyp, 2025 jyldyń jeltoqsan aıynda BRT jelisi iske qosyldy.