Almatynyń Raıymbek dańǵylynda BRT qalaı uıymdastyrylatyny belgili boldy
ALMATY. KAZINFORM – Uzyndyǵy shamamen 1,8 shaqyrym bolatyn Raıymbek dańǵylyndaǵy BRT pılottyq dáliziniń birinshi kezeńi Pýshkın kóshesinen Seıfýllın dańǵylyna deıin ótedi. Bul – qaıta qurý turǵysynan eń kúrdeli jáne qıyn ýchaske. Bul týraly «Vremıa» basylymyna bergen suhbatynda Almaty kólik júıesin damytý jobalyq ofısiniń basshysy Artýr Shahbazıan aıtty.
Onyń aıtýynsha, jyl sońyna deıin negizgi jer jumystaryn aıaqtaý josparlanyp otyr. Ýchaskede jabdyqtalǵan aıaldamalar paıda bolýy kerek, avtobýstar jańa bólingen jolaqtarmen júre bastaıdy.
«Osy ýchaskeniń kóp bóliginde bólingen syzyq qazirgi dańǵyldy ekige bóletin qoldanystaǵy býlvardyń eki jaǵynan, ortasynan ótedi. Seıfýllın dańǵylyna jaqyn jerde arnaıy syzyq oń jaqtaǵy shetki jolaqtarǵa aýysady. Raıymbek dańǵylynyń qazirgi kórinisi saqtalady: ortasynda býlvar,eki jaǵynda jol. Tek shetki jolaqtardan jáne aıaldamalardan bólingen jolaqtar býlvarlyq bólikke aýysady. Aıtpaqshy, barlyq aǵash ta sol kúıi qalady. Avtokólik qozǵalysyna arnalǵan jolaqtardyń negizgi sany saqtalady», - dep atap ótti Artýr Shahbazıan.
Sondaı-aq, ol Raıymbek dańǵylynyń jalpy abattandyrylatynyn atap ótti. Kommertsııalyq úı-jaılardyń mańdaıshalary men kirý toptary Almatyda qabyldanǵan dızaın-kodqa sáıkes qaıta resimdeletin bolady. Mamannyń aıtýynsha, qoǵamdyq kólik aıaldamalary platformalarda jabdyqtalyp, qıylystarǵa jaqyn ornalasady. Osylaısha, jolaýshylarǵa keıbir baǵyttardan basqalaryna aýysý yńǵaıly bolady. Spıker Rozybakıev, Jeltoqsan kóshelerinde jáne Seıfýllın dańǵylynda qosymsha kólik dálizderi paıda bolatynyn atap ótti. Kelesi jyly Raıymbek dańǵylynyń ekinshi bóligin - Seıfýllın dańǵylynan Saın kóshesine deıin abattandyrý jumysy bastalady. Úshinshi kezeńde ol «Barlyq» bazaryna deıin uzartylady.
«Raıymbek dańǵylynda baǵyttardyń qaıtalatyndyǵynan olardyń bir bóligin kezeń-kezeńimen joıý josparlanyp otyr. Baǵyttar azaıady, biraq syıymdylyǵy joǵary avtobýstar jıi júredi», - dep qosty Artýr Shahbazıan.
