Almatynyń Ortalyq stadıonynda jóndeý jumystary qashan bastalady

ALMATY. KAZINFORM - Ortalyq stadıon tarıhı kelbetin saqtaı otyryp jańǵyrtylady.

Byltyr jyl sońyndaǵy qorytyndy baspasóz máslıhatynda Almaty ákimi Erbolat Dosaev qalanyń bas stadıony jańǵyrtylatynyn aıtqan edi. 

- Kelesi jyly biz Ortalyq stadıondy qaıta qurýdy bastaımyz. Stadıon barlyq standarttarǵa saı bolady, bul jabyq alańǵa aınalady. Qazir tapsyrys berýshi men merdiger arasyndaǵy kelisimsharttyń jańa júıesi boıynsha damý tujyrymdamasy bekitildi. Joǵary kýboktardy eýropalyq jáne álemdik deńgeıde ótkizýge bolady, - dedi ákim.

Osy oraıda, qalalyq Qurylys basqarmasyna saýal joldadyq. Basqarma jaýabyna sáıkes, sport alańyndaǵy qurylys jumystarynyń naqty bastalatyn ýaqyty áli de belgisiz.

- Ortalyq stadıondy qaıta jańǵyrtý jumystary 2025-2026 jyldarǵa josparlanǵan. Qurylys-montajdaý jumystarynyń quny ázirlengen jobalaý-smetalyq qujattamanyń jáne memlekettik saraptamanyń nátıjesine sáıkes anyqtalatyn bolady, - dep habarlady vedomstvo.

Sonymen qatar basqarma jaýabynda nysannyń jobasy halyqaralyq deńgeıdegi tájirıbesi bar kompanııalarmen birlesip, tarıhı kelbetin saqtaı otyryp ázirlenetini aıtylǵan.

- Qaıta jańǵyrtý jumystarynan keıin stadıon syıymdylyǵy 23 000 orynnan 35 000 orynǵa kóbeıetin bolady. Qazirgi tańda Ortalyq stadıonda 46 adam jumys isteıdi, - delingen jaýapta.

Eske salaıyq, byltyr «Astana» men «Chelsı» oıyny kezinde Ortalyq stadıonynyń batys sektoryndaǵy alty qatar qardan ýaqytyly tazalanbaǵan. Osyǵan baılanysty Ortalyq stadıon basqarýshysy Baýyrjan Jumajanov qyzmetinen bosatyldy.

Buǵan deıin memleketke qaıtarylǵan «Almaty arena» men «Halyq arenada» qandaı ózgeris bolatynyn jazǵanbyz.