Almatynyń Ortalyq stadıonyn jańǵyrtý jobasy keıingi qaldy ma
ALMATY. KAZINFORM — Almatynyń Bostandyq aýdany ákimi Azamat Qaldybekov Ortalyq stadıonnyń bolashaǵyna qatysty pikir bildirdi.
Aýdan ákiminiń aıtýynsha, qazirgi ýaqytta megapolıste 45 myń kórermenge arnalǵan jańa zamanaýı stadıon salynyp jatyr. Degenmen, 1958 jyly salynǵan 23 myń oryndyq Ortalyq stadıon da nazardan tys qalmaıdy.
— Buǵan deıin Ortalyq stadıondy qaıta jańǵyrtý jáne ondaǵy oryn sanyn kóbeıtý jobasy qaralǵan edi. Alaıda jańa stadıonnyń qurylysyna baılanysty bul jumystar ázirshe toqtatyldy, — dedi ol Óńirlik kommýnıkatsııalar qyzmetinde ótken brıfıng kezinde.
Ákimniń sózinshe, Ortalyq stadıon sııaqty nysandarda aǵymdaǵy jóndeý jumystary jyl saıyn júrgizilip turady. Al ǵımarattyń qasbeti men aýmaǵy únemi baqylaýda, biraq nysanda kúrdeli jóndeýdiń qashan júrgiziletini belgisiz.
— Ortalyq stadıondy keshendi túrde kúrdeli jóndeýden ótkizý máselesi kún tártibinde bar, ol qazir qarastyrylyp jatyr. Merzimi týraly naqty eshteńe aıta almaımyn, bul Sportyq qurylystar dırektsııasynyń quzyretine jatady, — dedi Bostandyq aýdanynyń ákimi.
Eske salaıyq, buǵan deıin Almatyda jańa stadıonnyń bolashaq beınesi kórsetildi.
