Almatynyń ortalyǵynda kafege qosymsha salynǵan nysan buzyldy
ALMATY. KAZINFORM – Almatynyń ortalyǵynda ornalasqan kafeniń kireberisi buzylyp jatyr.
Qala qurylysyn baqylaý basqarmasynan málim etkendeı, Sátbaev kóshesi, 4a mekenjaıyndaǵy Juz kafesiniń janyndaǵy qurylys ruqsat qujattarynsyz salynǵan.
Sonymen qatar, ol erekshe qajettilikteri bar adamdarǵa arnalǵan pandýsty qosyp alyp, jalpy aýmaqta ornalasqan.
– Byltyr qazan aıynda jospardan tys tekserý barysynda «ALMA Construction and Design» JShS jalǵa alýshysyna qatysty turǵynnyń ótinishi negizinde basqarma ákimshilik quqyq buzýshylyq jónindegi mamandandyrylǵan aýdanaralyq sotqa materıaldardy jiberdi, ári ákimshilik sharalar qabyldady. 2024 jyldyń 22 qarashasynda sot zańsyz turǵyzylǵan qurylystardy buzý týraly qaýly shyǵardy jáne bir aıdan keıin, 27 jeltoqsanda Almaty qalalyq sotynyń qaýlysymen birinshi satydaǵy sheshim ózgerissiz qaldy, – dep habarlady basqarmadan.
Nysandy buzý Ádilet departamentiniń sot oryndaýshylarynyń qatysýymen bastaldy.
Osyǵan deıin Almatyda memlekettik qordyń jerinde zańsyz ornatylǵan statsıonarlyq emes saýda nysandaryn bólshekteý jumystary júrip jatqany týraly jazǵan edik.
Almatyda sońǵy eki jylda 65 zańsyz nysan, onyń ishinde turǵyn úı keshenderi tolyǵymen nemese ishinara buzyldy.