Almatynyń Naýryzbaı batyr kóshesinde avtobýs jolaǵynyń ornyna velojolaq salynady
ALMATY. KAZINFORM – Almatyda 1 tamyzdan bastap Naýryzbaı batyr kóshesiniń Raıymbek dańǵylynan Abaı dańǵyly aralyǵynda kólik qozǵalysynyń jańa syzbasy engiziledi.
Jol qozǵalysy jáne jolaýshylar kóligin uıymdastyrý basqarmasynyń málimetinshe, joba aıasynda kóshede oqshaýlanǵan velosıped jolaǵy salynady. Atap aıtqanda, júrgiziletin jumystar aıasynda qoǵamdyq kólikke arnalǵan arnaıy jolaq alynyp tastalady. Avtobýs baǵyttary Jeltoqsan kóshesine aýystyrylyp, Naýryzbaı batyr kóshesinde velojolaq uıymdastyrylady.
- Jańa sheshim velosıpedshilerdiń qaýipsizdigin arttyrýǵa, qaladaǵy velosıped jelisin damytýǵa jáne kólik legin tıimdi uıymdastyrýǵa múmkindik beredi. Osyǵan baılanysty júrgizýshiler men jol qozǵalysyna qatysýshylardan ózgeristi aldyn ala eskerip, baǵytyn jańa qozǵalys syzbasyna saı josparlaý, sondaı-aq jol belgileri men tańbalarynyń talabyn saqtaý suralady, - dep habarlady ákimdikten.
Eske salaıyq, buǵan deıin Almatyda kúndiz júk kólikteriniń qalaǵa kirýine shekteý qoıyldy. Shekteý kún saıyn saǵat 07:00-den 22:00-ge deıin Saın kóshesi – ál-Farabı dańǵyly – Shyǵys aınalma avtomobıl joly (ShAAJ) – Rysqulov dańǵyly aralyǵyndaǵy aýmaqta qoldanylady.
