Almatynyń Naýryzbaı aýdanyndaǵy sý máselesi qalaı sheshilip jatyr
ALMATY. KAZINFORM – Naýryzbaı aýdanynyń turǵyndaryn turaqty sýmen jáne káriz júıesimen qamtamasyz etý úshin aýqymdy jumys atqarylyp jatyr.
Bıyl jazda aýdan ákimdigi Aqjar jáne Qaraǵaıly shaǵyn aýdanynda 90 km jańa sýmen qamtý jáne sý burý jelilerin salý jumystaryn bastady. Bul maqsatqa 3,5 mlrd teńge bólindi.
Jumysty 2025 jyldyń qazan aıyna deıin aıaqtaý josparlanǵan.
Qarǵaly men Aqsaıdyń eki negizgi sý kózderinde sý laılansa aýdannyń ońtústik bóliginde turatyn turǵyndarǵa tirshilik nárin berý shekteletin. Bul másele «Qarǵaly» sý jınaǵyshyn salý arqyly sheshilmek.
Qazir sý jınaǵysh, magıstraldyq sý qubyry, sý daıyndaý stantsııasy jáne súzgi stantsııasynyń qurylysy syndy qurylystyń 1 kezeńi aıaqtaldy.
Ekinshi kezeńde sý tartýdy tolyq iske qosý úshin uzyndyǵy 6,5 km jańa káriz kollektorynyń qurylysyn bitirý kerek. Jumystar qyrkúıek aıyna deıin aqtalady.
Bul aýdannyń 50 myńnan astam turǵynyn sýmen turaqty qamtamasyz etýge jol ashady.
«Sondaı-aq, Naýryzbaı aýdanynyń batys bóliginiń 150 myń turǵynyn jáne Almaty oblysynyń eki aýylyn sapaly sýmen qamtamasyz etetin «Aqsaı» sý jınaǵyshynyń qurylysy júrgizilip jatyr. Jobany 2025 jyldyń qarasha aıynda aıaqtaý kózdelgen, qazirgi ýaqytta jumys 55% bitti», – dep atap ótti Erbolat Dosaev.
Buǵan qosa, osy jyldyń qyrkúıek aıynda Tastybulaq jáne Taýsamaly shaǵyn aýdandarynda ınjenerlik jeliler salý jobasy boıynsha memlekettik saraptama qorytyndysy shyǵady. Qurylys-montajdaý jumystaryn 2025 jyldyń kókteminde bastap, 2026 jyldyń II toqsanynda aıaqtaý josparlanǵan.
