Almatynyń Naýryzbaı aýdanynda jańa saıabaq salynady
ALMATY. KAZINFORM — Almatyda jańa qoǵamdyq keńistik paıda bolady.
Almaty ákimdiginiń málimetinshe, Naýryzbaı aýdanynda bıyl «Rahat» shaǵyn aýdanynda jańa saıabaq aımaǵyn qurý jumystary bastaldy. Saıabaq qurylysyn bıyl aıaqtaý josparlanyp otyr.
— Jobanyń tarıhy 2023 jyly bastaldy. Sol kezde Naýryzbaı aýdany ákimdiginiń bastamasymen 1,5 gektar jer telimin alý rásimi júrgizilgen. Atalǵan jer Qazaq ósimdik qorǵaý jáne karantın ǵylymı-zertteý ınstıtýtynyń janynda ornalasqan. Jospar boıynsha Qyzyl kitapqa engen aǵashtardy saqtaı otyryp, saıabaq salý kózdelgen. Keıin jerdiń ıesi aýysyp, ol «BI Development» qurylys kompanııasyna ótti. Kompanııa qol qoıylǵan memorandým aıasynda «BIOGRAPHY» dep atalatyn landshaftyq saıabaq jobasyn júzege asyrýǵa mindetteldi, — dep habarlady ákimdikten.
Jobada bar aǵashtardy saqtaý, yńǵaıly júrginshiler joldaryn salý jáne tabıǵı elementterdi saıabaq tujyrymdamasyna úılesimdi engizý erekshe nazarǵa alynǵan.
Eske salaıyq, buǵan deıin Bostandyq aýdanynda jańa saıabaq boı kóteretinin jazǵanbyz.
Sondaı-aq Alataý aýdanynda eń úlken saıabaqtardyń biri salynady.