Almatynyń Naýryzbaı aýdany jańajyldyq bezendirýge qansha qarajat jumsaǵaly otyr

ALMATY. KAZINFORM – Almatynyń Naýryzbaı aýdanynda jańajyldyq bezendirý jumystary jeltoqsan aıynda bastalady.

Naýryzbaı aýdany ákimdiginiń málimetinshe, jańajyldyq bezendirý jumystary Aqjar, Taý samaly, Tastybulaq, Taý joly, Qalqaman 1, 2, 3 jáne Shuǵyla shaǵyn aýdandarynda (Abaı dańǵyly, Áshimov, Tájıev, Nádirov, Jandosov, Stroıtelnaıa, Raıymbek dańǵyly, Q. Medeýbekov kósheleri) júrgiziledi.

– 2025-2026 jylǵy jańajyldyq maýsymǵa daıyndyq aıasynda Naýryzbaı aýdanynyń jergilikti bıýdjetinen 92,3 mıllıon teńge qarastyrylǵan. Bul qarajat aýdannyń merekelik bezendirilýine arnalǵan sharalardy uıymdastyrý men ótkizýge jumsalady. Negizgi jumystar – kósheler men aǵashtardy jaryqtandyrý, dekoratıv qurylymdar men jaryq ınstallıatsııalaryn ornatý, jaıaý júrginshiler kópirlerin bezendirý, ósip turǵan shyrshalardy gırlıandalarmen árleý, jaryq sharlary men kronshteınderdi kóshe shamdarynyń baǵandaryna ilý, - delingen Naýryzbaı aýdany ákimdigi habarlamasynda.

Memlekettik satyp alý portaly arqyly konkýrs ótkizilip, nátıjesinde merdiger retinde «SK PromStroıProekt» JShS tańdalǵan.

– Merekelik bezendirý kezinde jańa elementtermen qatar buryn paıdalanylǵan áshekeıler de qoldanylady. Barlyq shyǵyn (montaj, demontaj, paıdalaný jáne saqtaý) bıýdjet qarajaty esebinen tolyq óteledi. Jobany qarjylandyrý tolyǵymen jergilikti bıýdjet esebinen júrgiziledi, demeýshilik nemese bıýdjetten tys qarajat qarastyrylmaǵan. Jumystar 1 jeltoqsanda bastalady, - dep habarlady ákimdik.

Sonymen qatar qoldanylatyn qural-jabdyqtar zamanaýı energııa únemdeý jáne qaýipsizdik standarttaryna saı bolýǵa tıis. Bul maqsatta LED jaryqtandyrý, sertıfıkattalǵan materıaldar jáne qajetti qorǵanys deńgeıi bar ónimder paıdalanylady. Bul talaptardy oryndaýǵa jaýapty – merdiger kompanııa.

Eske salaıyq, 2024 jyly Almatyny jańajyldyq bezendirýge 800 mıllıon teńge bólingen edi.