Almaty tabıǵı qoryǵynda fototuzaqqa taýtekelerdiń teketiresi túsip qaldy
ASTANA. KAZIFORM – Almaty memlekettik tabıǵı qoryǵynyń aýmaǵynda ornatylǵan fototuzaqqa taýtekelerdiń taǵy bir qyzyqty sáti tirkeldi, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Baspasóz qyzmetiniń málimetterine qaraǵanda, bul joly kadrǵa múıiz tirestirip, ózara kúsh synasyp jatqan taýteke laqtary tústi.
Bir qaraǵanda bul naǵyz tartys sııaqty kóringenimen, shyn máninde mundaı qımyl-qozǵalys – jas taýtekelerdiń tabıǵı minez-qulqynyń bir bóligi. Osyndaı «jattyǵýlar» arqyly olar eptiligin shyńdap, kúshin synaıdy jáne bolashaq tirshilikke beıimdeledi.
-Jabaıy tabıǵattaǵy osyndaı sátter janýarlar áleminiń qyzyqty qyrlaryn jaqynnan tanýǵa múmkindik beredi. Al sizdiń oıyńyzsha, qaısysy myqty ?, dep jazdy, mınıstrliktiń baspasóz qyzmeti.
Osyǵan deıin Aqsý-Jabaǵyly qoryǵynyń jabaıy janýarlary fototuzaqqa túsip qalǵany týraly jazdyq.
