Almatynyń mektepteri Kundelik ornyna otandyq elektrondyq jýrnalǵa kóshti
ASTANA. KAZINFORM — Almaty qalasy Bilim basqarmasynyń sheshimine sáıkes, 2025–2026 oqý jylynyń úshinshi toqsanynan bastap qala mektepteri BilimClass elektrondyq jýrnalyna kóshedi.
BilimClass — tegin mobıldi qosymshasy bar, serverleri Qazaqstan aýmaǵynda ornalasqan jáne paıdalanýshylar derekteriniń qaýipsizdigi men qupııalyǵyn qamtamasyz etetin tolyqtaı qazaqstandyq platforma.
Bul sheshimge deıin platforma jan-jaqty taldaýdan ótip, Almaty qalasyndaǵy 15 mektepte pılottyq rejımde aprobatsııalandy. Sonyń nátıjesinde BilimClass júıesi barlyq qajetti talaptarǵa saı ekenin kórsetti. Platformaǵa kóshý aldynda muǵalimder BilimClass-pen jumys isteý boıynsha tegin oqýdan ótti. Sonymen qatar qoldaý qyzmeti mektepterdi súıemeldep, týyndaǵan suraqtarǵa jedel túrde jaýap beredi.
— BilimClass elektrondyq jýrnaly mektepti basqarý júıesi, oqý kontenti, ádistemelik taldaý jáne analıtıka quraldaryn da usynady. Qazirgi tańda BilimClass júıesin Qazaqstannyń 11 óńirindegi 2,5 mıllıon oqýshy men 350 myńǵa jýyq muǵalim paıdalanyp otyr. Atap aıtqanda, platforma Almaty, Aqmola, Batys Qazaqstan, Qostanaı, Aqtóbe, Ulytaý, Abaı, Qyzylorda, Jetisý, Túrkistan jáne Soltústik Qazaqstan oblystarynda qoldanysta. Platformany ázirleýshi — Qazaqstandaǵy jetekshi Bilim Group IT holdıngi. Onyń quramyna BilimLand, OnlineMektep, BilimKids, iTest, BilimUstaz, Kitap.kz jáne SmartNation sııaqty ónimder kiredi, — delingen Bilim basqarmasynyń habarlamasynda.
BilimClass — serverleri Qazaqstan aýmaǵynda ornalasqan tolyqtaı otandyq ónim. Júıe paıdalanýshylar derekteriniń qaýipsizdigi men qupııalyǵyn qamtamasyz etip, zańnamalyq talaptardy qatań saqtaıdy. Ata-analar men oqýshylar BilimClass mobıldi qosymshasyn tegin paıdalanady. Qosymsha sabaq kestesi, sabaqqa qatysý, oqý úlgerimi men úı tapsyrmalary týraly tolyq aqparat usynady. Pedagogter úshin platformada kúntizbelik-taqyryptyq josparlaý, qashyqtan sabaq ótkizý múmkindigi, óz sabaqtaryn júkteý, ınteraktıvti tapsyrmalar, BJB/TJB katalogy, chat jáne oqýshylarmen keri baılanys quraldary qoljetimdi.
Platformaǵa kóshý oqý protsesine áser etpeýi úshin arnaıy qysqy demalys kezeńinde júrgizildi. Osy ýaqytta muǵalimder júıemen jumys isteý boıynsha oqýdan ótti.
Sonymen qatar mektepterge BilimClass platformasymen qatar, Bilim Group kompanııasynyń basqa da ónimderi usynylady. Olardyń qatarynda UBT-ǵa daıyndalýǵa kómektesetin iTest onlaın-trenajeri, bastaýysh synyp oqýshylaryna arnalǵan qazaq tilindegi iMektep vıdeosabaqtar platformasy, sondaı-aq TMD aýmaǵyndaǵy eń iri tsıfrlyq bilim berý kontent qory sanalatyn BilimLand te bar.
Buǵan deıin habarlanǵandaı, 2027 jyly UBT tapsyrmalary halyqaralyq standarttarǵa beıimdeledi.