Almatynyń Medeý – Tuıyqsý jolynda kólik qozǵalysy tórt aıǵa shekteledi
ALMATY. KAZINFORM — Medeý — Tuıyqsý avtojolynda ınjenerlik ınfraqurylymdy jańǵyrtýǵa baǵyttalǵan josparly jumystar júrgiziledi.
Almaty ákimdiginiń málimetinshe, bul jumystar ınjenerlik jelilerdiń senimdiligin arttyrýǵa jáne Shymbulaq shatqalynda ornalasqan nysandardyń úzdiksiz jumysyn qamtamasyz etýge baǵyttalǵan. Osyǵan baılanysty 2026 jyly 24 shilde men 30 qarasha aralyǵynda Medeý — Tuıyqsý avtojolynda kólik qozǵalysyna ýaqytsha shekteý engiziledi.
— Bul sharalar jol qozǵalysynyń qaýipsizdigin qamtamasyz etý, arnaıy tehnıkanyń kedergisiz jumys isteýi jáne jóndeý jumystaryn belgilengen merzimde aıaqtaý úshin qajet, — dep habarlady ákimdikten.
Alaıda Shymbulaq shatqalyndaǵy týrıstik nysandar qalypty rejımde jumysyn jalǵastyra beredi. Jol tótenshe jaǵdaılar jáne apattyq qyzmetterdiń kólikterine, shatqal turǵyndaryna, sondaı-aq arnaıy tehnıkaǵa ashyq bolady. Jaıaý týrıster úshin shatqal men týrıstik nysandarǵa kirý múmkindigi saqtalady. Balama baǵyt retinde Stýdentter soqpaǵyn paıdalaný usynylady. Baǵyt «Medeý» bógeti janyndaǵy № 12 jáne № 21 avtobýs baǵyttarynyń sońǵy aıaldamasynan bastalyp, bógettiń tómengi jaǵymen ótip, «Gorelnık» vızıt ortalyǵyna deıin jalǵasady.
— Topyraqty soqpaqpen ótetin baǵytta eńis jerler de bar. Osyǵan baılanysty týrısterdiń yńǵaıly sporttyq nemese trekkıngke arnalǵan aıaq kıgeni jón. Qala turǵyndary men qonaqtarynan saparyn aldyn ala josparlap, ýaqytsha shekteýdi eskerýdi, jol belgileriniń talaptaryn saqtap, retteýshi qyzmetkerlerdiń nusqaýyn oryndaýdy suraımyz, — delingen málimdemede.
Eske salaıyq, buǵan deıin Almatynyń Jandosov kóshesinde kólik qozǵalysyna eki apta shekteý engiziletinin jazǵanbyz.
