Almatynyń Medeý aýdanynda eki ǵımarat pen birneshe kólik órtke orandy

ALMATY. KAZINFORM — Almatynyń Medeý aýdanyndaǵy «Geolog» baǵbandyq seriktestiginiń aýmaǵynda órt shyqty. Qazirgi ýaqytta qalanyń órt sóndirý qyzmeti qyzyl jalyndy sóndirip jatyr.

Tótenshe jaǵdaılar departamentiniń málimetinshe, oqıǵa ornyna jetken órt sóndirýshiler eki ǵımarattyń, úsh jeńil avtokóliktiń jáne qurylys qaldyqtarynyń órtenip jatqanyn anyqtaǵan. Qyzmetkerler dereý órt sóndirý stanoktaryn paıdalanyp, jalyndy aýyzdyqtaýǵa kirisken.

— Órttiń ári qaraı taralýyna jol bermeý úshin barlyq qajetti shara qabyldandy. Sý úzdiksiz jetkizilýi úshin qyzmetterdiń ózara árekettestigi uıymdastyrylǵan, - delingen habarlamada.

TJM kúshteri órtti oqshaýlap úlgerdi. Qazirgi ýaqytta órtti tolyq sóndirý jumystary jalǵasyp jatyr.

Oqıǵa ornynda 1949 jyly týǵan er adam medıtsınalyq kómekke júgindi. Ony jedel medıtsınalyq járdem brıgadasy qarap shyqqannan keıin №4 qalalyq klınıkalyq aýrýhanaǵa jetkizdi.

Eske salaıyq, buǵan deıin Almaty oblysyndaǵy «Narynqol» shekara zastavasynyń aýmaǵyndaǵy qyzmettik turǵyn úı órtengenin habarlaǵanbyz.