Almatynyń qýyrshaq teatry Kanadada gran-prı jeńip aldy

ALMATY. KAZINFORM – Almaty Memlekettik qýyrshaq teatry Ottava qalasynda ótken І-shi Halyqaralyq «Ottava» qýyrshaq teatrlar festıvalinde «Romeo men Djýletta» qoıylymy úshin Gran-Prı júldesine ıe boldy.

Kanada memleketiniń astanasy Ottava qalasynda tuńǵysh ret І-shi Halyqaralyq «Ottava» qýyrshaq teatrlar festıvali ótkizildi. Halyqaralyq shyǵarmashylyq pen yntymaqtastyqty kózdegen mádenı is-sharaǵa elimizdiń kók týyn ustap shyqqan alǵashqy qazaqstandyq óner órdasy Almaty Memlekettik qýyrshaq teatry boldy. Otandyq teatrdyń shyǵarmashylyq ujymy festıval aıasynda kanadalyq kórermenderdiń nazaryna óz repertýaryndaǵy erekshe qoıylymdardyń biri, aǵylshyn dramatýrgy Ýılıam Shekspırdiń áıgili tragedııasy jelisimen sahnalanǵan, názik te taza mahabbattyń qudiretin sezdiretin «Romeo men Djýletta» spektaklin usyndy.

Aıta keteıik, qýyrshaq teatrynyń repertýaryndaǵy «Romeo men Djýletta» spektakli 2019 jyly belgili rejısser Dına Jumabaevanyń jetekshiligimen jaryqqa shyqqan. 2022 jyly atalmysh spektakl Bolgarııa Respýblıkasy Varna qalasynda ótken halyqaralyq «Altyn delfın» qýyrshaq teatrlar festıvalinde úzdik dep tanylyp «Gran-prı» júldesine, «Eń úzdik er adam» júldesine, «Eń úzdik debıýt» júldesine laıyqty bolǵan. Al oǵan deıin 2021 jyly Qaraǵandy qalasynda ótkizilgen Áshirbek Syǵaı atyndaǵy «Syn – shyn bolsyn» respýblıkalyq teatrlar festıvalinde І-shi oryndy jeńip alǵan.

Qazaqstan Respýblıkasynyń Kanadadaǵy Tótenshe jáne Ókiletti Elshisi Dáýletbek Qusaıynov festıval aıasynda qýyrshaq teatryna qoldaý bildirdi.

«Bizdiń jastar óte joǵary deńgeıdegi jumysty kórsetti jáne óte qyzyq mahabbat hıkaıasyn sezindirdi. Óz daryndaryn, jalpy qazaq jastaryna tán talantty Kanada halqyna tanystyrdy», – dedi Dáýletbek Qusaıynov.

Eske salaıyq, buǵan deıin Almatydaǵy qýyrshaq teatrynyń maýsymy eki qoıylymmen jabylǵanyn jazǵan edik.