Almatynyń kommýnaldyq qyzmeti nóser jańbyrǵa baılanysty kúsheıtilgen rejımge kóshti
ALMATY. KAZINFORM — Almatyda aýa raıynyń qolaısyzdyǵyna baılanysty kommýnaldyq qyzmet kúsheıtilgen daıyndyq rejımine aýystyryldy.
«Almaty Tazalyq» MKK jáne merdiger uıymdar táýlik boıy kezekshilik uıymdastyrdy. Jumystarǵa 104 arnaıy tehnıka, 74 motopompa jáne 12 assenızatorlyq kólik tartylyp, onyń 9-y sý basý qaýpi joǵary aýmaqtarǵa ornalastyryldy.
75 jedel brıgada (425 jol salasy jumysshysy) jasaqtalyp, 2 300 qum toltyrylǵan qap ázirlendi. Jalpy táýliktik kezekshilikke 2 710 jol salasy qyzmetkeri jumyldyrylady.
Almaty qalasynyń Qutqarý qyzmeti de kezekshilikke shyqqan: 15 motopompa men 1 assenızatorlyq kólik tartylǵan. Tótenshe jaǵdaılar departamenti 53 tehnıka men 240 qyzmetkerdi jumyldyrdy.
«Qazgıdromet» RMK boljamynsha, 16 sáýirde kún ala bultty bolady, saǵat 16:00–den 17 sáýir 02:00–ge deıin keı jerlerde 17 mm-ge deıin nóser jańbyr jaýyp, naızaǵaı oınap, jeldiń ekpini 15-18 m/s deıin jetedi. Kúndizgi aýa temperatýrasy +17…+19°S.
17 sáýir kúni saǵat 11:00–den kúni boıy 12 mm-ge deıin jańbyr jaýady, naızaǵaı oınaıdy, jeldiń ekpini 18 m/s deıin bolmaq. Túnde synap baǵanasy +8…+10°S, kúndiz +11…+13°S kórsetedi.
Eske salaıyq, buǵan deıin «Qazgıdromet» sınoptıkteri 16 sáýirde elimizdiń birneshe óńirinde nóser jańbyr men burshaq jaýatynyn eskertken edi.
