Almatynyń kommýnaldyq qyzmeti kúsheıtilgen rejımge kóshedi

ALMATY. KAZINFORM – «Qazgıdromet» boljamyna sáıkes, 23 qyrkúıek kúni tańǵy saǵat 5-ten bastap 24 qyrkúıek tańǵa deıin Almatyda jańbyr jaýyp, keı jerde onyń mólsheri 20 mıllımetrge deıin jetýi múmkin. 

Batystan soqqan jeldiń jyldamdyǵy 3–8 m/s bolyp, ekpini 18 m/s-qa deıin jetedi. Kúndiz aýa temperatýrasy +17…+19 °S bolady dep boljanyp otyr. 24 qyrkúıekke qaraǵan túni jaýyn-shashyn jalǵasady, al kúndiz kún ashyq bolady.

Almaty ákimdigi sý basýy múmkin jaǵdaılardyń aldyn alý jáne olardyń saldaryn der kezinde joıý úshin qala boıynsha kommýnaldyq jáne jedel qyzmetter táýlik boıy kezekshilik etetinin habarlady.

— Bul jumystarǵa «Almaty tazalyq» mekemesi men merdiger uıymdardyń 123 arnaıy tehnıkasy, 74 motopompa, 20 assenızator kóligi (onyń 13-i sý basý qaýpi bar oryndarǵa qoıylǵan), sondaı-aq 75 jedel brıgada tartyldy. Olardyń quramynda 425 jumysshy bar, barlyǵy motopompamen jáne qajetti quraldarmen jabdyqtalǵan, — dep habarlady ákimdikten.

Sondaı-aq Almaty qalasy Qutqarý qyzmeti de kúsheıtilgen tártipte jumys isteıdi. Olardyń qaraýynda 1 assenızator kóligi men 15 motopompa bar. Odan bólek Almaty qalasy Tótenshe jaǵdaılar departamenti tarapynan 53 arnaıy tehnıka men 246 qyzmetker tolyq daıyndyqta turady.

Eske salaıyq, ótken aptada qatty jaýyn-shashyn kezinde Almatyda jol jabyny opyrylyp, 13 avtokólik zaqymdandy.