Almatynyń kommýnaldyq qyzmeti aýa raıyna baılanysty kúsheıtilgen rejımge kóshti
ALMATY. KAZINFORM – Aldaǵy kúnderi qar jaýyp, aýa temperatýrasynyń tómendeýine baılanysty Almatynyń kommýnaldyq qyzmeti kúsheıtilgen jumys rejımine aýystyryldy. Bul týraly qalanyń kommýnaldyq ınfraqurylymdy damytý basqarmasy men turǵyn úı ınspektsııasynyń ókilderi aıtty.
«Qazgıdromet» RMK málimetinshe, 15 qańtardan 16 qańtarǵa qaraǵan túni Almatyda jaýǵan qar 17 qańtar keshke deıin jalǵasady. 16 qańtarda túngi jáne kúndizgi aýa temperatýrasy –5…–7 gradýs shamasynda bolady. Al 17 qańtarda túnde aýa temperatýrasy –11…–13 gradýsqa deıin tómendep, kúndiz –7…–9 gradýs shamasynda saqtalady.
Osyǵan baılanysty 15 qańtardan bastap qaladaǵy barlyq kommýnaldyq qyzmet kúsheıtilgen rejımde jumys isteýge kóshirildi. Óndiristik bazalarda júrgizýshiler, mehanızatorlar men jol salasy jumysshylarynyń táýlik boıǵy kezekshiligi uıymdastyryldy.
– Kóktaıǵaqtyń aldyn alý maqsatynda qar jaýǵanǵa deıin arnaıy tehnıka ornalastyrylatyn aýmaqtarda 210 qum sebetin kólik kezekshilikke qoıylady. Sonymen qatar aldyn ala negizgi magıstraldyq kóshelerge suıyq reagentter sebilmek. Táýlik boıy 1 030 birlik arnaıy tehnıka, sondaı-aq jeke uıymdardan tartylatyn 200 tehnıka men 2 710 jol salasy jumysshysy jumyldyrylady. Aýla aýmaqtaryn tazalaý jumystaryna 1 790 jumysshy men 256 birlik arnaıy tehnıka tartylady, - delingen habarlamada.
Buǵan qosa, joldyń qaýipti ýchaskelerinde, eńis pen jotalarda, sondaı-aq jolaıyryqtaryna kirip-shyǵatye joldarǵa kóktaıǵaqtyń aldyn alý jáne ony ýaqytyly joıý úshin 75 jedel brıgada jol jamylǵysynyń jaǵdaıyn úzdiksiz baqylap otyrady.
Sonymen qatar Almatynyń qutqarý qyzmeti 16 birlik arnaıy tehnıka men 50 qyzmetkerdi tarta otyryp, táýlik boıy kezekshilik uıymdastyrady. Qalalyq tótenshe jaǵdaılar departamenti tarapynan 53 birlik arnaıy tehnıka men 244 adamnan turatyn jeke quram kezekshilik atqarady.
Aýdan ákimdikterinde atqarylyp jatqan jumystardyń oryndalýyn baqylaý maqsatynda táýlik boıǵy kezekshilik engiziledi.
Eske salaıyq, buǵan deıin sınoptıkter Qazaqstannyń búkil aýmaǵynda aýa raıyna baılanysty eskertý jasaǵan edi.