Almatynyń kólik qurylymyn odan ári jaqsartýǵa 34 mlrd teńge bólindi

ALMATY. KAZINFORM — Almaty qalasynyń 3 jyldyq bıýdjeti bekitilgen qalalyq máslıhattyń kezekten tys sessııasy barysynda megapolıs ákimi Erbolat Dosaev kelesi jylǵa josparlanǵan kólik ınfraqurylymyn damytý jónindegi negizgi jobalar týraly aıtyp berdi.

— Biz qoǵamdyq kólik sapasyn damytýǵa basa nazar aýdara otyryp, Almaty qalasynyń kólik qurylymyn qalyptastyrýdy jalǵastyryp jatyrmyz. 2025 jyly Úlken Almaty aınalma avtomobıl jolyna deıin radıaldy joldardy salý úshin Abaı dańǵyly men Saın kóshesin uzartý aıaqtalady, sondaı-aq Tilendıev jáne Soltústik aınalma kóshelerin uzartý bastalady. Jalpy, kólik qurylymyn qalyptastyrýdy jalǵastyrý jáne radıaldy joldardy uzartý úshin kelesi jylǵa 34 mlrd teńge bólindi, — dedi Erbolat Dosaev.

Qala basshysy qoǵamdyq kólikterdiń sapasyn arttyrý úshin bıyl 600 gazben júretin jáne 100 elektrobýs satyp alynǵanyn atap ótti, bul qoǵamdyq kóliktiń ortasha paıdalaný merzimin 6 jyldan 2,5 jylǵa deıin tómendetýge, qala turǵyndarynyń saparlarynyń jaılylyǵy men ekologııalyq tazalyǵyn jaqsartýǵa múmkindik berdi. Sondaı — aq, osy jyly trolleıbýs parkin 100% jańartý aıaqtaldy.

— 2025 jyly Almaty ákimdigi Jeltoqsan kóshesi boıynsha BRT jelisin salýdy jalǵastyrý, 100 jańa elektr avtobýstaryn satyp alý jáne trolleıbýstarǵa arnalǵan 10 tartqysh qosalqy stantsııalardy jańartý sııaqty jobalardy iske asyrý úshin alǵash ret «jasyl» oblıgatsııalar shyǵarýdy josparlap otyr. Memleket basshysynyń tapsyrmasy boıynsha biz batys baǵyttaǵy qoldanystaǵy metro jelisin «Barlyq» bazaryna deıin keńeıtýge jáne shyǵys baǵytta Almaty qalasynyń halyqaralyq áýejaıyna deıin jańa jeli salý boıynsha syrttan qaryz tartý boıynsha belsendi jumystar júrgizip jatyrmyz, — dedi Erbolat Dosaev.

Osyǵan deıin Almatyda metro jelisi áýejaıǵa deıin uzartylatyny týraly jazǵan edik.