Almatynyń qymbat aýdanynda taǵy bir zańsyz nysan buzyldy
ALMATY. KAZINFORM — Almatynyń Medeý aýdanynda zańsyz salynǵan nysandy buzý jumystary bastaldy.
Qala qurylysyn baqylaý basqarmasynyń málimetinshe, sot sheshimi negizinde Begalın kóshesi, 140 mekenjaıyndaǵy turǵyn úıge zańsyz salynǵan eki qabatty qosymsha nysan buzylady.
— Menshik ıesi sáýlet-josparlaý tapsyrmasy men tehnıkalyq jobany rásimdemeı-aq, turǵyn úıdi qaıta jańartqan. Osylaısha, úıge qosymsha qurylys salynyp, ústinen qosymsha úı-jaılar turǵyzylǵan, — dep habarlady vedomstvo ókilderi.
Buǵan deıin menshik ıesine ákimshilik sharalar qoldanylyp, anyqtalǵan zańbuzýshylyqtardy joıý týraly nusqama berilgen. Alaıda nusqama talaptary oryndalmaǵandyqtan, basqarma sotqa talap-aryz joldaǵan.
Medeý aýdandyq sotynyń sheshimimen qala qurylysyn baqylaý basqarmasynyń turǵyn úıge salynǵan ústeme qabat pen eki qabatty qosalqy nysandy buzý týraly talap-aryzy qanaǵattandyryldy.
Sot sheshimin oryndaý úshin úı ıesi nysandy óz kúshimen buza bastady.
Eske salaıyq, buǵan deıin Rozybakıev kóshesi, 249/1 mekenjaıyndaǵy qosalqy salynǵan nysandy buzý jumystary bastaldy.
