Almatynyń keı aımaǵynda 4 kún gaz bolmaıdy
ALMATY. KAZINFORM – Medeý aýdanynyń keı aýmaǵynda 12–16 mamyr aralyǵynda gaz berý ýaqytsha toqtatylady.
«QAZAQGAZ AIMAQ» AQ Almaty óndiristik fılıaly jańadan salynǵan gaz qubyrlaryn qoldanystaǵy jelilerge qosý jumystaryna baılanysty gaz berý ýaqytsha toqtatylatynyn habarlady.
Jumystar eki kezeńmen júrgiziledi. Birinshi kezeń 2026 jyly 12–16 mamyr aralyǵynda ótedi. Bul ýaqytta Medeý aýdanyndaǵy «Kóktóbe» shaǵyn aýdany — Dostyq dańǵyly — Armıanskaıa kóshesi — Táttimbet kóshesi aýmaǵynda gaz berý ýaqytsha toqtatylady.
Sondaı-aq jumys júrgizý kezeńinde avtokólik qozǵalysyna ishinara shekteý engizilýi múmkin:
— J.Omarova kóshesinde Táttimbet kóshesimen qıylys mańynda;
— Lýganskıı kóshesinde Armıanskaıa kóshesinen ál-Farabı dańǵyly boıyndaǵy kópirge deıingi aralyqta.
- Jańa jelilerdi qosý atalǵan aýdanda gazben jabdyqtaýdyń senimdiligi men turaqtylyǵyn arttyrýǵa múmkindik beredi. Turǵyndardan ýaqytsha qolaısyzdyqqa túsinistikpen qaraý suralady, - dep habarlady «QAZAQGAZ AIMAQ» AQ Almaty óndiristik fılıaly.
Eske salaıyq, Astanadaǵy N.Tilendıev dańǵylynyń bir bóligi 7 kúnge jabyldy.
