Almatynyń qaı kóshelerinde avtoturaq baǵasy 150 jáne 200 teńge boldy
ALMATY. KAZINFORM — Almatynyń kommýnaldyq avtoturaqtarynda 4 qazannan bastap jańa tarıfter qoldanysqa engizildi.
Jańa tártipke sáıkes, kólik qozǵalysy salystyrmaly túrde tómen ýchaskelerde tarıf burynǵydaı saǵatyna 100 teńge bolyp qaldy. Avtoturaqtarǵa suranys ortasha aýmaqtarda saǵatyna 150 teńge belgilendi. Al turaq oryndary tapshy ári kólik qozǵalysy joǵary, suranys eń kóp aımaqtarda tarıf saǵatyna 200 teńge boldy.
Kazinform agenttiginiń saýalyna jaýap bergen qala ákimdigi baǵasy ózgergen avtoturaq mekenjaılarynyń tizimin usyndy. Jańa tarıf boıynsha bir kósheniń boıyndaǵy avtoturaqta ártúrli baǵa bolýy múmkin. Máselen, Abaı dańǵylynda Gagarın dańǵylynan Rozybakıev kóshesine deıingi baǵa 100 teńge bolsa, Áýezov kóshesinen Gagarın dańǵylyna deıin 150 teńge. Al Nazarbaev dańǵylynan Dostyq dańǵylyna deıin Abaı dańǵylynyń boıynda kólikti qaldyrý úshin endi saǵatyna 200 teńge tóleý qajet.
Tarıf tek qala ortalyǵyndaǵy avtoturaqtarda ózgermegen. Kólik júktemesine qaraı qalanyń shetki tustaryndaǵy da baǵa aýysqan. Megapolıstiń batys bóligindegi Momyshuly kóshesinde Jubanov kóshesinen Tóle bı kóshesine deıin 100 teńge, Marǵulan kóshesinen Ulyqbek dańǵylyna deıin 200 teńge belgilengen.
Sondaı-aq qaladaǵy bazarlar men olardyń janyndaǵy turaqtardyń barlyǵynda derlik kommýnaldyq avtoturaq baǵasy kóterilgen. Ásirese, halyq arasynda «Baraholka» atymen bazarlardy atap ótýge bolady. Munda «Adem» saýda ortalyǵynan «Alataý 2» bazaryna deıin turaq quny 150 teńge bolyp bekitildi.
Jańa tarıfter boıynsha tolyq tizimdi maqalada usynylǵan ınfografıkadan kóre alasyzdar.
Eske salaıyq, buǵan deıin Almatyda avtoturaq tarıfiniń ózgerýine baılanysty júrgizýshiler neni bilýi kerek ekenin jazǵanbyz.
Sonymen qatar Almatyda endi arnaıy turaqta kólik saqtaý úshin aqy alynatynyn jazǵan edik.
