Almatynyń qaı aýdandarynda jańa joldar paıda bolady
ALMATY. KAZINFORM – Bıyl Almatyda 300 shaqyrym joldy jóndeý kezinde polımerli bıtým negizindegi asfaltbetondy qospa qoldanylady.
Bıyl megapolıste jóndeý jumystary magıstraldyq jáne aýdandyq mańyzy bar kóshelerde júrgiziledi. Ortasha jóndeý jumystaryn mamyr aıynda bastap, qarasha aıynyń sońyna deıin aıaqtaý josparda. Sondaı-aq «Alǵabas», «Aqjar», «Shuǵyla», «Shańyraq-1», «Jas-Qanat», «Boraldaı» jáne «Rahat-Mádenıet» sııaqty birneshe shaǵyn aýdandarda 35 shaqyrym jańa jol salý kózdelgen.
– Injenerlik jelilerdi salý aıaqtalǵan kóshelerde jol qurylysy bastalady. Jaqsy jáne qanaǵattanarlyq jaǵdaıdaǵy joldardyń úlesi 2024 jyldyń qorytyndysy boıynsha 92 paıyz. Bıyl bul kórsetkishti 95 paıyzǵa jetkizý josparlda, - dep jaýap berdi qalalyq mobıldilik basqarmasy Kazinform agenttigi joldaǵan saýalǵa.
Kóshelerdiń tolyq tizimi men ortasha jol jóndeý jumystarynyń jospary tehnıkalyq qujattama saraptamasynyń qorytyndysy shyqqannan keıin jarııalanatyn bolady.
Sonymen qatar 2025 jyly qala kósheleri men jol jelilerine 5 myń qalqymaly lıýkter men nóser qubyrlary ornatylmaq.
Kóshelerdi uzartý
Bıyl maýsym aıynda Jansúgirov pen Seıfýllın dańǵylyndaǵy jolaıyryqtyń qurylysy aıaqtalady. Sondaı-aq Saın kóshesin Rysqulov dańǵylynan Aqyn Sara kóshesine deıin jáne Abaı dańǵylyn qalanyń shekarasyna deıin uzartý jumystary aıaqtalady.
Tóle bı, Jubanov, Rysqulov dańǵyldaryn ýzartý jumystary jalǵasyp jatyr. Sondaı-aq Muqanov, Hmelnıtskıı jáne Ońǵarsynova kóshelerin uzartý kózdelgen. Qazir onyń jobalyq-smetalyq qujattamasy (JSQ) ázirlendi.
Jalpyqalalyq mańyzy bar magıstraldy kóshelerdiń biri – Tilendıev kóshesi. Bas josparǵa jáne egjeı-tegjeıli josparlaý jobalaryna (ETJ) sáıkes bul kósheni Rysqulov dańǵylynan qala shekarasyna deıin, uzyndyǵy 10,5 km uzartý josparda.
Eske salaıyq, buǵan deıin joba boıynsha 140-tan astam jer telimi satyp alynýy múmkin ekeni týraly jazǵan bolatynbyz.
Buǵan deıin ákimdik Almatydaǵy kólik keptelisi máselesi kezeń-kezeńimen sheshiletini týraly aıtqan bolatyn.
Almaty aglomeratsııasy aıasynda QR Prezıdentiniń tapsyrmasyna sáıkes Almaty oblysynyń aýmaǵy arqyly alty radıaldy kósheniń qurylysy júrgizilip jatyr. Onyń ishinde Abaı, Rysqulov, Aqyn Sara, Saın, Tilendıev jáne Soltústik aınalma kósheleri bar.
– Bul jobanyń negizgi maqsaty – kólik ınfraqurylymyn jaqsartý, jol jelileriniń qoljetimdiligi men sapasyn arttyrý, azamattardyń jol júrý ýaqytyn qysqartý. Joba kólik aǵyndaryn ońtaılandyrý jáne ekologııalyq taza tehnologııalardy engizý arqyly jyldamyraq jáne yńǵaıly baǵyttardy qurýǵa, aýanyń lastanýyn azaıtýǵa baǵyttalǵan. Sondaı-aq, jol qozǵalysy qaýipsizdigin arttyrýǵa erekshe kóńil bólinip otyr. Bul jol-kólik apattaryn azaıtyp, júrgizýshiler men jaıaý júrginshiler úshin jaǵdaı týǵyzady, – dep atap ótti oblystyq Jolaýshylar kóligi jáne avtomobıl joldary basqarmasynan.