Almatynyń qaýipti taýly aımaǵynda zańsyz úsh qabatty úı salynǵan

ALMATY. KAZINFORM – «Jantóbe» baý-baqsha seriktestiginiń №51 ýchaskesinde qurylysy júrip jatqan úsh qabatty nysan buzyldy.

Almatynyń Qala qurylysyn baqylaý basqarmasynyń málimetinshe, atalǵan ǵımarat topyraq kóshkini qaýpi bar aımaqta ornalasqan.

Buǵan deıin menshik ıesine (jeke tulǵa) ruqsat qujattarynyń bolmaýyna baılanysty ákimshilik sharalar qoldanylyp, jospardan tys tekserý aıasynda zańbuzýshylyqtardy joıý týraly nusqama berilgen.

Keıin basqarma tarapynan bul nusqamany májbúrlep oryndatý, atap aıtqanda nysandy buzý týraly talappen Almaty qalasy Medeý aýdandyq sotyna talap-aryz berildi.

– Sot talap-aryzdy qanaǵattandyryp, nysandy buzý týraly sheshim shyǵardy. Qazir ony súrý jumystary Ádilet departamentiniń sot oryndaýshylarynyń qatysýymen bastaldy, - dep habarlady basqarmadan.

Osyǵan deıin Almatyda memlekettik qordyń jerinde zańsyz ornatylǵan statsıonarlyq emes saýda nysandaryn bólshekteý jumystary júrip jatqany týraly jazǵan edik. 

2023 jyldyń basynan beri 74 zańsyz nysan, onyń ishinde turǵyn úı keshenderi tolyǵymen nemese ishinara buzyldy.