Almatynyń qarjy uıymdaryna 189,9 mln teńge aıyppul salyndy
ALMATY. KAZINFORM - Byltyr Almatynyń 159 qarjy uıymyna 189,9 mln teńge aıyppul salyndy. Bul týraly óńirlik kommýnıkatsııalar qyzmetinde ótken baspasóz máslıhatynda Qarjy naryǵyn retteý jáne damytý agenttiginiń tutynýshylardyń quqyqtaryn qorǵaý departamentiniń dırektory Aleksandr Terentev aıtty.
Spıkerdiń sózinshe, 2023 jyly Agenttikke azamattar men zańdy tulǵalardan 59 myńnan astam ótinish túsken.Taldaý kórsetkendeı, qarjylyq qyzmetterdi tutynýshylardyń quqyqtaryn buzýdyń kópshiligi kredıtorlardyń azamattardyń merzimi ótken bereshegin retteý boıynsha sharalar qabyldamaýy týraly boldy.
«Anyqtalǵan buzýshylyqtar boıynsha 2023 jyldyń basynan beri Agenttik qarjy uıymdaryna qatysty 224 shara qoldanyp, shamamen 189,9 mln teńge somasyna 159 ákimshilik jaza shyǵardy. Qarjylyq qyzmetterdi tutynýshylardyń quqyqtaryn qorǵaý maqsatynda 2021 jylǵy 1 qazannan bastap kredıttik uıymdardyń tólemge qabiletsiz qaryz alýshy – jeke tulǵalardyń bereshegin retteýdiń biryńǵaı zańnamalyq tártibi qoldanylady»,- dedi Aleksandr Terentev.
Sarapshy qaryzdar men mıkrokredıtter boıynsha merzimi ótken jaǵdaıda qaryz alýshylarǵa ne isteý kerektigin aıtyp berdi.
«2021 jylǵy 1 qazannan bastap Qazaqstanda kredıtti óteýde qıyndyqtarǵa tap bolǵan azamattardyń problemalyq bereshegin retteý tártibi qoldanylady. Bankter men mıkroqarjy uıymdary (MQU) ony oryndaýǵa jáne boryshkerlerdiń qaryzdary men mıkrokredıtterin qaıta qurylymdaýǵa ótinishterin qaraýǵa mindetti» - dep naqtylady spıker.