Almatynyń qandaı kóshelerinde bıyl birjaqty qozǵalys engizildi

Almaty qalasy Jol qozǵalysy jáne jolaýshylar kóligin uıymdastyrý basqarmasynyń basshysy Erjan Dıhanbaevtyń aıtýynsha, keı kóshelerde birjaqty qozǵalys engizý - iri bıýdjet shyǵyndarynsyz kólik qozǵalysyn ońtaılandyrýǵa múmkindik beredi.

— Biz áýeli jańa jol tańbalary men ýaqytsha qozǵalys syzbalary arqyly pılottyq sheshimderdi synaqtan ótkizip, oń nátıje bolǵan jaǵdaıda olardy keńinen engizý tásilin belsendi qoldanyp kelemiz. Bul úlken shyǵynsyz ári ıkemdi túrde jol qozǵalysyn jaqsartýǵa múmkindik beredi. Jańa qozǵalys syzbalary kóshelerdiń ótkizý qabiletin 20-25% arttyryp, jol-kólik oqıǵalaryn 35%-ǵa deıin azaıtýǵa jáne qalanyń negizgi kólik toraptaryna túsetin júktemeni tómendetýge múmkindik beredi, — dedi ol.

Bıyl aldymen, Ýálıhanov kóshesiniń Qabanbaı batyr kóshesinen Qazybek bı kóshesine deıingi bóliginde soltústik baǵytta birjaqty qozǵalys engizildi. Keıin Jýkov kóshesinde (ońtústik baǵytta) jáne Manaev kóshesinde (soltústik baǵytta) Zataevıch kóshesinen Ahmedıarov kóshesine deıingi aralyqta birjaqty qozǵalys uıymdastyryldy.

Odan bólek:

— Dostyq dańǵylynyń Gogol kóshesinen Jibek joly dańǵylyna deıingi bóliginde soltústik baǵytta;

— Zenkov kóshesiniń Maqataev kóshesinen Gogol kóshesine deıingi bóliginde ońtústik baǵytta;

- Áýezov aýdanynda Atameken kóshesiniń («Atameken» shaǵyn aýdany) № 103 úıden № 108 úıge deıingi bóliginde ońtústik baǵytta birjaqty qozǵalys engizildi.

Keıin taǵy úsh kóshede jańa kólik qozǵalysynyń shemasy tanystyryldy. Prokofev kóshesinde Abaı dańǵylynan Kishi Abaı kóshesine deıingi aralyqta soltústik baǵytta, al Kishi Abaı kóshesinde Prokofev kóshesinen Brýsılovskıı kóshesine deıingi aralyqta shyǵys baǵytta kólik qozǵalysy bekitildi. Sondaı-aq Túrkebaev kóshesinde Sátbaev kóshesinen Tóle bı kóshesine deıingi aralyqta soltústik baǵytta birjaqty qozǵalys uıymdastyryldy.

Oǵan qosa kólikter Qarasaı batyr kóshesinde — Rozybakıev kóshesinen Varlamov kóshesine deıin tek batys baǵytta júretin boldy. Al Qulymbetov kóshesinde — Varlamov kóshesinen Rozybakıev kóshesine deıin tek shyǵys baǵytta qatynaıdy.

- Bir baǵytty qozǵalys uıymdastyrylǵan kóshelerde keri ózgeris jasalyp, eki jaqty qozǵalys qaıta qalpyna keltirilgen jaǵdaılar bolǵan joq, - dep atap ótti Jol qozǵalysy jáne jolaýshylar kóligin uıymdastyrý basqarmasynan.

Eske salaıyq, Almatyda Tımırıazev jáne Jandosov syndy iri kóshelerde de birjaqty kólik qozǵalysy engizilýi múmkin ekeni aıtylǵan bolatyn. Bul bastama turǵyndar arasynda keńinen talqylandy. Ásirese, Tımırıazev kóshesiniń máselesi jıi qozǵaldy. Sebebi munda qalada tolyqqandy jumys istep turǵan jalǵyz BRT jelisi bar. Turǵyndardyń bir toby ony alyp tastaý tıimsiz ekenin jazdy.

Qoǵam talqysyna túsken máselege qatysty Prezıdent janyndaǵy QR UǴA akademıgi, Kólik ǵylymy jáne tehnologııalar ınstıtýtynyń dırektory, tehnıka ǵylymdarynyń doktory Baǵdat Teltaev ǵylymı zertteý júrgizip, onyń nátıjesin Kazinform agenttigine eksklıýzıvti túrde usyndy.