Almaty oblysynda óndiriletin basty ónim qandaı

QONAEV. KAZINFORM - Almaty oblysynda 1,4 myńnan astam kásiporyn bar. Bul týraly Almaty oblysynyń kásipkerlik jáne ındýstrııalyq-ınnovatsııalyq damý basqarmasy habarlady.

Mekeme málimetine sáıkes, Almaty oblysynda búgingi kúni 1406 ónerkásiptik kásiporyn jumys isteıdi. Onyń 14-i iri, 46-sy orta, qalǵandary kishi kásiporyndar.

Al Almaty oblysynyń kásipkerlik jáne ındýstrııalyq-ınnovatsııalyq damý basqarmasynyń basshysy Qýanysh Baqytulynyń aıtýynsha, óńirdegi kásiporyndar óndiretin basty ónim - sýsyndar.

- 2023 jyly eń kóp óndirilgen ónim - sýsyndar 424 mlrd teńgege eń kóp boldy. Bıyl qańtar-qyrkúıek aılarynda 1000 jumys ornyn qura otyryp, 87,7 mlrd teńge somasyna 30 ónerkásiptik joba iske qosyldy, - dedi Qýanysh Baqytuly Kazinform tilshisine bergen jaýabynda.

Eske salaıyq, buǵan deıin Almaty qalasyndaǵy basty óndiris salasy - mashına jasaý ekenin jazǵanbyz. Jalpy Almaty qalasynyń ındýstrıaldy aımaǵynda jumys isteıtin kásiporyndar 2023 jyly 801,3 mlrd teńgeniń ónimin óndirgen. Onyń ishinde byltyr 48 857 kólik quraly shyǵarylǵan.

Sondaı-aq elimizde 200 myńǵa jýyq tehnıka óndirilse de, Ónerkásip jáne qurylys mınıstriniń úıinde qazaqstandyq ónim joq ekenin jazǵan edik.