Almatynyń «Halyq arena» kesheninde antıterrorlyq oqý-jattyǵý ótedi
ALMATY. KAZINFORM — Erteń, 6 tamyz kúni «Halyq Arena» kópfýnktsıonaldy kesheniniń aýmaǵynda josparly antıterrorlyq oqý-jattyǵý ótkiziledi.
Almaty qalasy polıtsııa departamentiniń málimetinshe, oqý jattyǵý saǵat 08:00–den 13:00–ge deıin bolady. Onyń barysynda adamdar kóp shoǵyrlanatyn nysandardaǵy túrli yqtımal jaǵdaılarǵa jedel áreket etý máseleleri pysyqtalady.
— Osyǵan baılanysty azamattardan qaýipsizdik sharalaryn saqtaýdy, sondaı-aq is-sharaǵa tartylǵan memlekettik organdar qyzmetkerleriniń zańdy talaptaryn oryndaýdy suraımyz. Resmı aqparat kózderine súıenip, jalǵan málimetterdiń taralýyna jol bermeýlerińizdi ótinemiz, — dep habarlady departamentten.
Tártip saqshylary qala turǵyndaryn atalǵan is-sharaǵa túsinistikpen qarap, qaýipsizdik talaptaryn qatań saqtaýǵa jáne memlekettik organdar qyzmetkerleriniń zańdy talaptaryn oryndaýǵa shaqyrdy.
— Qazaqstan Respýblıkasynyń Ákimshilik quqyq buzýshylyq týraly kodeksiniń 443-babyna sáıkes, qoǵamdyq tártipti qamtamasyz etýge qatysýshy tulǵanyń zańdy talabyna baǵynbaý ákimshilik jaýapkershilikke ákep soǵatynyn eske salamyz, — delingen Terrorızmge qarsy kúres jónindegi Almaty qalalyq jedel shtabynyń málimdemesinde.
Eske salaıyq, Almatyda túnde tóbeles shyǵarǵan bir top azamat ustaldy.
