Almatynyń grek-rım, áıelder jáne erkin kúres federatsııasyna jańa basshy keldi
ASTANA. KAZINFORM - Almatyda jetekshiler, jattyqtyrýshylar, sportshylar men kúres belsendileriniń basyn qosqan qalalyq grek-rım, áıelder jáne erkin kúres federatsııasynyń esep berý-saılaý konferentsııasy aıaqtaldy.
Konferentsııada federatsııanyń sońǵy úsh jyldaǵy jumysynyń qorytyndylary, Parıjde ótetin aldaǵy Olımpıada oıyndaryna daıyndyq jáne jańa basshylyqty saılaý sııaqty negizgi máseleler talqylandy.
Qalalyq kúres federatsııasynyń basshysy Aıdar Berkimbaev sportshylardyń erekshe jetistikterin, onyń ishinde erkin kúresten álem chempıonatynyń tarıhyndaǵy tuńǵysh altyn medaldi Rızabek Aıtmuhan jeńip alǵanyn atap ótti.
Astanada ótken kúresten Qazaqstan Respýblıkasynyń chempıonatynda almatylyqtar joǵary deńgeı kórsetip, erkin kúresten jalpy esepte úshinshi, áıelder kúresinen birinshi oryndy jeńip aldy.
Federatsııa basshylyǵyndaǵy ózgerister týraly habarlandyrý mańyzdy sát boldy. Osyǵan baılanysty Aıdar Berkimbaev basshylyq qyzmetinen ketip, onyń ornyna kásipker jáne metsenat Omar Álıevti taǵaıyndaýdy usyndy. Onyń kandıdatýrasyn biraýyzdan qoldady.
Omar Álıev ózine bildirgen senim úshin rızashylyǵyn bildirip, balalar men jastardy sportqa baýlýǵa basa nazar aýdaryp, qalada kúresti damytýǵa nıetti ekenin jetkizdi.
Joǵary nátıjeler men kúresti damytýǵa qosqan úlesi úshin Aıdar Berkimbaevqa Respýblıkalyq kúres federatsııasy prezıdentiniń Alǵys haty tabys etildi.
Konferentsııaǵa qatysýshylar U-17 jáne U-23 jas sanattary boıynsha aldaǵy QR chempıonatynda sportshylar men jattyqtyrýshylar quramyna sáttilik tiledi.
