Almatynyń gıdrologııalyq beketterine kapsýla úıler qoıyldy
ALMATY. KAZINFORM – Almaty qalasyndaǵy Úlken Almaty shatqalyndaǵy Kúmbelsý gıdrobeketinde kapsýla úıler ashyldy.
Almaty qalalyq Tótenshe jaǵdaılar departamentinen málim etkendeı, jańa kapsýlalyq úıler teńiz deńgeıinen 2 myń metr bıiktikte qoıyldy. Taý ózenderindegi sý deńgeıin baqylaıtyn qyzmetkerler munda qysy-jazy bolady. Táýlik boıy monıtorıng júrgizedi.
– Jańa kapsýla úıler zamanǵa saı jasalǵan. Aýmaǵy – 24 sharshy metr. Іshinde jumys isteıtin oryn, jatyn jáne jýynatyn bólmesi bar. Al, jylý men jaryq avtonomdy túrde beriledi. Qajetti jıhazben jabdyqtalǵan, - dep habarlady departamentten.
Vedomstovadan baqylaý beketiniń aýmaǵynda kóshetter otyrǵyzylatynyn atap ótti.
Eske salaıyq, osyǵan deıin Almaty taýlarynda adasqan týrıster úshin úıshikter ornatylǵan bolatyn.
Aıta keteıik, úıshikter qutqarýshylarmen shuǵyl baılanys júıesimen jabdyqtalǵan, olarda alǵashqy kómek apattyq jıyntyǵy – alǵashqy medıtsınalyq kómek qobdıshasy, mobıldi qurylǵylardy zarıadtaý stansasy, jyly kórpe jáne buzylmaıtyn azyq-túlik jıyntyǵy (sirińke, tez daıyndalatyn kespe, kreker, bankadaǵy botqa, otyn) bar. Arnaıy úıshikter alystan kózge birden shalynatyn ashyq qyzǵylt sary túske boıalǵan.