Almatynyń gaz quıý beketterindegi avtobýstar kezegi: másele qalaı sheshilip jatyr
ALMATY. KAZINFORM — Ótken aptalarda Almatyda avtobýstardyń uzyn-sonar kezegi qalyptasty. Qazir bul másele ishinara sheshilgendeı kóringenimen, áli de almatylyqtardy alańdatady. Sondyqtan Kazinform agenttigi qala ákimdigine júgindi.
Gaz — qoǵamdyq kólik úshin negizgi janarmaı túrleriniń biri. Búginde megapolıs kóshelerinde gazben júretin 1 608 avtobýs qatynaıdy, bul — jalpy qoǵamdyq kólik sanynyń jartysyna teń.
Avtobýstar qaı jerde gaz quıady
Jol qozǵalysyn uıymdastyrý jáne jolaýshylar kóligi basqarma basshysynyń orynbasary Azamat Eshanquldyń aıtýynsha, qazir qala avtobýstaryna gaz quıý úshin 8 gaz toltyrý kompressorlyq stansasy jumys istep tur. Olar kommýnaldyq jáne jekemenshik avtobýs parkter aýmaǵynda, ındýstrııalyq aımaqtarda, sondaı-aq jeke operatorlardyń óndiristik alańdarynda ornalasqan.
«AvtoGazAlmaty» JShS-niń 4 stansasy kelesi mekenjaılarda ornalasqan:
— Alataý aýdanyndaǵy Han Shatyr kóshesi, 288;
— Áýezov aýdanyndaǵy «Aqsaı-1» shaǵyn aýdany, 40;
— Bostandyq aýdanyndaǵy Ótepov kóshesi, 18;
— Almaty oblysy Іle aýdanyndaǵy Pervomaıskaıa neftebaza kóshesi, 159.
Al «Ecosta» JShS-yna tıesili gaz beketi Túrksib aýdanyndaǵy Gete kóshesi, 327/2 mekenjaıynda, № 1 kommýnaldyq avtobýs parkiniń janynda ornalasqan. Taǵy eki gaz toltyrý kompressorlyq stansasy «Almatyelektrotrans» kommýnaldyq avtobýs parkter aýmaǵynda qyzmet kórsetedi: Maılın kóshesi, 79v/2 mekenjaıyndaǵy № 2 avtobýs parkinde jáne Kalınıngrad kóshesi, 45 mekenjaıyndaǵy № 3 avtobýs parkinde.
Segizinshi stantsııa («Aspro CNG» JShS) Alataý aýdanyndaǵy Baýyrjan Momyshuly kóshesi, 1/65 mekenjaıynda ornalasqan.
Kezek nelikten paıda boldy
Bıyl shilde aıynda jumys istep turǵan 8 gaz beketiniń úsheýinde aqaý bolǵan. Basqarma buǵan gaz qysymynyń tómendep ketýi, sondaı-aq tehnıkalyq toraptar men kompressorlyq qural-jabdyqtardy jóndeý qajettiligi sebep bolǵanyn habarlady.
Osyǵan baılanysty avtobýstardyń bir bóligi jumys istep turǵan stantsııalarǵa baǵyttalǵan. Sondyqtan olarǵa túsken júkteme artyp, saldarynan irgeles kóshelerde avtobýstar kezegi paıda boldy.
Jaǵdaıdy turaqtandyrý maqsatynda aqaýy bar stansalarda jóndeý-qalpyna keltirý jumystary júrgizilip, sondaı-aq taǵy eki stansa synaq rejıminde iske qosylǵan. Vedomstvo málimetinshe, qazirgi ýaqytta keptelis joq, kezek qysqarǵan.
Stansadaǵy barlyq baǵanany nelikten paıdalanýǵa bolmaıdy
№ 2 avtobýs parkindegi gaz quıý beketinde barlyq baǵana tehnıkalyq turǵydan tolyq jaramdy. Biraq 10 gaz quıý baǵanynyń tek 8-i shtattyq rejımde paıdalanylady, al ekeýi rezervte tur.
Basqarma jaýabyna sáıkes, mundaǵy qural-jabdyqtarda aqaý joq. Tek barlyq 10 baǵana birdeı qosylǵan kezde qubyrdaǵy gaz qysymy tómendep ketedi. Jaqyn mańdaǵy úılerdiń turǵyndary turmystyq gaz qysymynyń tómendegenine shaǵymdanǵan. Sondyqtan stansada 8 baǵana avtobýstardy gazben qamtamasyz etedi.
Árbir ekinshi avtobýs gazben júredi
Kún saıyn qalalyq baǵyttarǵa 3,2 myń qoǵamdyq kólik shyǵady. Rezervti qosqanda olardyń sany 3,8 myńǵa jýyqtaıdy. Onyń ishinde 1 608 avtobýs gazben, 1 248-i dızel otynymen júredi. Odan bólek qalada 211 elektrobýs pen 156 trolleıbýs bar. Osylaısha, Almatyda gazben júretin avtobýstardyń úlesi shamamen 49,9%-ǵa jetken. Sondyqtan gaz quıý beketteriniń jumysy qoǵamdyq kóliktiń kedergisiz qatynaýyna tikeleı yqpal etedi.
Basqarma ókilderi qoldanystaǵy barlyq stantsııa aqaýsyz jumys istegen jaǵdaıda, olardyń jalpy ótkizý qabileti qazirgi gazben júretin avtobýstar parkin qamtamasyz etýge tolyq jetetinin aıtady.
Jańa stansalar qaıda ashylady
Almaty ákimdigi jańa nysandar arqyly qoldanystaǵy ınfraqurylymǵa túsetin júktemeni azaıtýdy kózdep otyr. Búginde eki qosymsha stantsııa synaq rejıminde jumys istep tur.
Onyń biri — Jetisý aýdanynda, «Kókjıek Sıtı» turǵyn úı kesheniniń mańynda ornalasqan. «Wood stoke» JShS ınvestıtsııalyq jobasy aıasyndaǵy stansa 31 shildeden beri synaqtan ótip jatyr. Qazir ol táýligine 150–170-ke jýyq avtobýsqa qyzmet kórsetedi. Tolyqqandy paıdalanýǵa berý merzimi synaq nátıjeleri boıynsha belgilenedi.
«Ecobus Service» JShS-niń taǵy bir gaz quıý beketi Almaty oblysy Іle aýdanynyń Pervomaı ónerkásiptik aımaǵynda ornalasqan. Ol da 31 shildeden bastap synaq rejıminde jumys istep jatyr. Kún saıyn 160-qa jýyq avtobýsqa otyn quıady.
Taǵy birneshe nysan qurylys kezeńinde tur. Alataý aýdanynyń ındýstrııalyq aımaǵynda «Hyundai Trans Kazakhstan» JShS ınvestıtsııalyq jobasy aıasynda jeke gaz quıý beketń bar jańa avtobýs parkin salý josparlanǵan. Ol 2027 jyly paıdalanýǵa berilýi tıis.
«BaTy travel kompanııasy» JShS Mámbetov kóshesi, 1/67 mekenjaıy boıynsha jańa stansany iske qospaq. Ony 2027 jyldyń basynda ashý josparlanǵan.
«Dýman Trans KZ» JShS-niń taǵy bir stansasy bıyl qyrkúıekte paıdalanýǵa berilýi kerek. Onyń jobalyq qýattylyǵy táýligine 17 myń tekshe metr gazǵa jetedi.
Eske salaıyq, Jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev gaz quıý beketterindegi avtobýs kezegine qatysty pikir bildirdi.
