Almatynyń emdeý mekemeleri kúsheıtilgen jumys rejımine kóshedi
ALMATY. KAZINFORM –1 qyrkúıekten bastap qaladaǵy emhanalardyń barlyq egý kabınetteri kúsheıtilgen jumys rejımine aýystyrylady. Bul týraly óńirlik kommýnıkatsııalar qyzmetinde ótken baspasóz máslıhaty barysynda Almaty qalalyq qoǵamdyq densaýlyq saqtaý basqarmasynyń epıdemıologııalyq baqylaý bóliminiń basshysy Baqjanar Muhamadıeva málim etti.
Spıkerdiń sózinshe, kún sýytqanda jedel respıratorlyq vırýstyq ınfektsııalar men tumaýdyń paıda bolý qaýpi artady. Osyǵan baılanysty Qoǵamdyq densaýlyq saqtaý basqarmasy turǵyndardy maýsymdyq epıdemııadan qorǵaý úshin keshendi shara qabyldady.
«1 qyrkúıekten bastap emhanalardyń barlyq egý kabınetteri men súzgileri demalys jáne mereke kúnderin qosa alǵanda, kúsheıtilgen jumys rejımine aýystyrylady. Qala boıynsha feldsherlik brıgadalardyń jumysy úshin emhanalar janyndaǵy jedel medıtsınalyq járdem bólimshesi deńgeıinde shuǵyl 4 sanattaǵy shaqyrýlarǵa qyzmet kórsetý úshin 102 jedel medıtsınalyq avtokólik bólindi, bul patsıentterdiń úılerine baryp, jyldam qyzmet kórsetýge múmkindik beredi», – dedi ol.
Budan bólek, JRVI jáne tumaý juqtyrǵan naýqastardy aýrýhanaǵa jatqyzý úshin qala statsıonarlarynda 453 oryn daıyndaldy jáne qosymsha naýqastar sany artqan jaǵdaıda taǵy 90 tósek ornalastyrý múmkindigi qarastyrylǵan.
«Almatynyń medıtsınalyq mekemelerinde ókpeni jasandy jeldetýge arnalǵan 892 apparat (ÓJJ) bar, bul tumaý men JRVI aýyr túrlerimen aýyratyn naýqastarǵa kómek kórsetýge kerek. Sondaı-aq, qalanyń jedel medıtsınalyq járdem qyzmeti halyq arasynda tumaý, JRVI jáne KVI-men syrqattanýshylyq kóterilgen jaǵdaıda, JRVI belgileri bar jáne olardyń asqynýlary bolǵan júkti áıelder jáne 1 jasqa deıingi balalardy ýaqtyly aýrýhanaǵa jatqyza otyryp, basym tártippen qyzmet kórsetýge daıyn», – dep atap ótti Baqjanar Muhamadıeva.
Qazir jedel medıtsınalyq járdem qyzmetinde 186 brıgada bar. Qajet bolǵan jaǵdaıda olardyń sany 200-ge deıin artady.
Osyǵan deıin Almaty qalasynyń sanıtarııalyq-epıdemıologııalyq baqylaý departamenti, megapolıste koronavırýs ınfektsııasy boıynsha epıdemıologııalyq jaǵdaı turaqty ekenin aıtqan bolatyn.
