Almatynyń eks-ákimi Erbolat Dosaev nesimen este qaldy
ALMATY. KAZINFORM – 2022 jyly Almaty ákiminiń qyzmetine kirisken Erbolat Dosaev 3 jyl 4 aı jumys istedi. Osy ýaqyt ishinde elimizdiń eń biri megapolısin basqarǵan ol nesimen este qaldy?
Erbolat Asqarbekuly Dosaev 1970 jyly 21 mamyrda Almaty qalasynda dúnıege kelgen. 1987 jyly O.Jáýtikov atyndaǵy Respýblıkalyq fızıka-matematıkalyq mektep-ınternatyn, keıin Almaty energetıkalyq ınstıtýtyn, Baýman atyndaǵy Máskeý Memlekettik tehnıkalyq ýnıversıtetin bitirdi.
Óz mansabynda birqatar joǵary laýazymdardy atqarǵan. Olardyń qatarynda Qarjy mınıstri, Densaýlyq saqtaý mınıstri, Ulttyq ekonomıka mınıstri, QR Ulttyq Bankiniń tóraǵasy jáne basqa da jaýapty qyzmetter bar. Tolyǵyraq Kazinform agenttiginiń Derekqor aıdarynan oqı alasyzdar.
2022 jyly 31 qańtar kúni Erbolat Dosaev Almaty qalasynyń ákimi qyzmetine taǵaıyndaldy. Al Baqytjan Saǵyntaev Memleket basshysynyń jarlyǵymen qyzmetinen bosatyldy. Ol Almaty ákimi laýazymyna 2019 jyly taǵaıyndalǵan bolatyn.
Jańa ákimniń basty mindetteriniń biri - Qańtar oqıǵasy kezinde japa shekken kásipkerlerge kómek berý, búlingen memlekettik, áleýmettik nysandardy qalpyna keltirý jáne qala qaýipsizdigin kúsheıtý boldy. Sondyqtan alǵashqy kúnderi Erbolat Dosaev bıznes ókilderimen kezdesip, shyǵyn óteýdi jedeldetý máselelerin talqylady.
Birneshe kúnnen keıin Úkimettiń keńeıtilgen otyrysynda Erbolat Dosaev Almaty qalasyn qalpyna keltirý jáne odan ári damytý týraly aıtty. Onyń josparynda qala ekonomıkasyn ósýink, bıznesti qoldaýǵa, jańa jumys oryndaryn ashýǵa, bilim berý mekemelerinde qaýipsizdikti kúsheıtýge basymdyq berildi.
Al 2022 jyldyń sońynda Almaty ákimi zardap shekken 1,6 myńnan astam kásiporynǵa 16,2 mlrd teńge kóleminde ótemaqy tólengenin, al jeke tulǵalarǵa 613,5 mln teńge somasynda múliktiń zalaly ótelgenin atap ótti. 2023 jyly qazan aıynda Qańtar oqıǵasynan keıin qatty zaqym kelgen qala ákimdiginiń ǵımaratyn qalpyna keltirý jumystary aıaqtaldy.
Synǵa ákelgen qala halqymen kezdesýler
Erbolat Dosaev almatylyqtar esinde qalanyń ár aýdanynda ótken turaqty kezdesýlerimen qalatyny sózsiz. 2022 jyly ákim halyqpen 24 ret (ár toqsan saıyn 8 aýdanda bir kezdesý), 2023 jyly 32 ret kezdesken. 2024 jyldan bastap Erbolat Dosaev halyqpen kezdesýleriniń formatyn ózgertip, kóshpeli kezdesýler uıymdastyra bastady.
Kóbine mektep ne ýnıversıtetterdiń qabyrǵasynda ótken kezdesýlerdegi sóıleý máneri úshin Erbolat Dosaev qatty synǵa ushyrady. Keıin ol halyqpen kezdesýleri nege emotsınaldy ótetinin túsindirdi.
Jol, keptelis jáne petıtsııa
2023 jyl Almatyda aýqymdy jol jóndeý jumystary bastaldy. Biraz ýaqytqa magıstraldy kósheler - Abaı jáne Ál-Farabı dańǵyldary ishinara jabyldy, sonyń saldarynan megapolıste keptelis kúsheıdi. Al ákimdik atalǵan kóshelerde alǵash ret jańa tehnologııalardy qoldana otyryp jóndeý júrgizilgenin habarlady.
Jalpy jóndeý jumystary 200 km bolatyn 230 kósheni qamtydy.
Qalada jol jóndeý jumystary bastalǵannan keıin almatylyqtar áleýmettik jelide óz narazylyqtaryn bildire bastady. Tipti Erbolat Dosaevtyń qyzmetten ketýin talap etetin petıtsııa jarııalandy. Ákim keıinirek bul jaǵdaıǵa túsinikteme berdi. Ol qalada 2 mıllıonnan astam adam turatynyn jáne petıtsııaǵa sanaýly ǵana adam, onyń ishinde JSN-y joq adamdar qol qoıǵanyn atap ótti.
Bas jospar, mektep avtobýstary jáne jastar ortalyqtary
Erbolat Dosaevtyń tusynda Almatyda birshama jańa sheshimder de qabyldandy. Mysaly, 2023 jyly Erbolat Dosaevtyń basshylyǵymen jasalaǵan Almaty qalasynyń 2040 jylǵa deıingi Bas jospary bekitildi.
Megapolıs bolashaǵy úshin mańyzdy qujat qoǵamda, ásirese sarapshylary men qoǵam belsendileri arasynda qyzý talqyǵa túsken bolatyn.
Sondaı-aq 2023 jyly qyrkúıek aıynan bastap Almatyda alǵash ret oqýshylardy oqý oryndaryna aparatyn mektep avtobýstary qatynaı bastady.
Al 2024 jyly Almatynyń 8 aýdanynda jastarǵa arnalǵan komıýnıtı ortalyqtar ashyldy. Ol úshin ákimdik 2023 jyly ǵımarat ne arnaıy keńse satyp alyp, olardy jóndeýden ótkizgen. Mundaı ortalyqtar kóp aýdıtorııadan turady, yńǵaıly kovorkıng aımaqtarymen jáne yńǵaıly ári ýaqytty tıimdi ótkizý úshin qajetti jabdyqtarmen jabdyqtalǵan.
Sonymen qatar Erbolat Dosaev zańsyz qurylys máselesine de mán berdi. 2022 jyldyń basynan 2025 jyldyń mamyryna deıin megapolıste ruqsatsyz salynǵan 88 nysan tolyǵymen nemese jartylaı buzyldy.
Memleket basshysy Qasym-Jomart Toqaev 2022 jyly qarasha aıynda Almatyǵa jumys sapary kezinde qaladaǵy ózekti máselelerdiń biri - aýyz sý máselesin sheshýdi tapsyrǵan bolatyn. Ákimniń halyqpen kezdesýleri kezinde de almatylyqtar taý bókterindegi aýyz sý máselesin jıi kóterdi.
Sondyqtan Almaty ákimi bul baǵytqa da kóńil bóldi. Naýryzbaı jáne Qarasaı aýdandarynyń 100 myń turǵynyn sýmen qamtamasyz etetin «Aqsaı» sý jınaǵyshtyń qurylysy bastaldy. Ol 2025 jyldyń qarasha aıynda iske qosylady dep josparlanyp otyr.
Al 2024 jyly Medeý aýdanynda «Balqash» taza sý rezervýary paıdalanýǵa berildi.
Bıyl naýryz aıynda Erbolat Dosaev Prezıdentke qalany órkendetý týraly baıandady. Qala ákimine Prezıdentke júrgizilgen jumystar jáne qabyldanǵan sharalar týraly eki aptada bir ret baıandap otyrý tapsyrylǵan edi.