Almatynyń ekologııa máselesi qalaı sheshiledi
ALMATY. KAZINFORM – Almatyny qalany damytý baǵdarlamasynda qorshaǵan ortany jaqsartý úshin shyǵaryndylardy azaıtý jospary bar. Bul týraly Jetisý aýdany turǵyndarymen kezdesýi barysynda Erbolat Dosaev aıtty.
Almaty turǵyny ekologııa máselesin kóterdi. Ol shahar basshysynan qalanyń ekologııasyn jaqsartý boıynsha ákimdiktiń josparyn surady.
– Almatynyń sheshilmeı kele jatqan keı máseleleri 1-2 jyl emes, jyldar boıy qordalanyp qaldy. Ol - shekten tys qurylys, jeke kóliktiń kóptigi, kólik ınfraqurylymynyń durys damymaýy. Bul máselelerdi qalany damytý baǵdarlamasynda engizdik. 2025 jyly «Samuryq Energo» kompanııasymen birlesip JEO-2 jańǵyrtýdyń birinshi kezeńin aıaqtaımyz. Kelesi jyly túpkilikti aıaqtaý, basty mindetimiz. Bul jaǵdaıda biz shyǵaryndylardy aıtarlyqtaı azaıtamyz. Gazǵa kóshý atmosferaǵa shyǵarylatyn qaldyqtardy 90%-ǵa nemese 34 myń tonnaǵa qysqartýǵa múmkindik beredi, – dedi ákim.
Ekinshi mindet – kólik ınfraqurylymy men qoǵamdyq kólikti damytý.
– Jyl sońyna deıin Raıymbek pen Jeltoqsan boıyndaǵy BRT-ny aıaqtaımyz, elektr avtobýstaryn jappaı satyp alamyz, alǵashqy 200 avtobýsty satyp aldyq. Jeke tasymaldaýshylar taǵy 200 qoǵamdyq kólik satyp alady. 2026 jyldyń sońyna deıin bizdiń barlyq qoǵamdyq kólik ekologııalyq taza bolady dep esepteımiz. Sonymen qatar 2026-2027 jyldary Úlken Almaty aınalma avtomobıl jolyna deıingi radıaldy joldardyń aıaqtalýy qalamyzdyń soltústik aýdandaryndaǵy júktemeni jeńildetedi dep kútilýde. Bul bizdiń aldymyzda turǵan mindetter, – dedi qala basshysy.
Erbolat Dosaev ózi de, balalary da ózgeler sııaqty bir aýamen tynys alatynyn, ekologııalyq ahýaldy jaqsartý basty nazarda ekenin atap ótti.
– Jasyl Almatyǵa baǵdarlama boıynsha kóshemiz. Sonymen qatar, jasyl jelekter óte mańyzdy. Byltyr biz aýdandardy avtomatty sýarýmen jáne jańa kóshettermen qamtamasyz ettik. Bul - qylqan japyraqty emes, japyraqty aǵashtar. Ekologııa máselesine men de ýaıymdaımyn. Densaýlyq saqtaý basqarmasy aýanyń sapasyna baılanysty turǵyndar arasynda allergııanyń kóbeıgenin aıtqan kezde, qatty alańdaımyn, – dedi ol.
Eske salaıyq, buǵan deıin Almatyda aýa sapasyn lastaıtyn basty faktorlar qandaı ekenin jazǵanbyz.